Qulimiguullit Qaqortumi innuttaasunut akornutaapput

Qaqortumi heliporti Danmarkimi Silaannakkut Angallannermi Pisortaqarfimmiit immikkut akuerisaalluni illut najugaqarfiusut akornanni inissisimavoq. Heliportip eqqaani najugallit helikopterit nipiliornersuat, minnerunngitsumillu orsussap tipersua, qatsulluinnarpaat. Helikopteri tikilersoq heliportip akinnguani najugalik Sofie Kielsen KNR Kujataanit pulaarneqarpoq.

- Ullormut arlaleriaraangami ilaanni qasunartaqaaq. Siornatigut suligallaratta itinerusumik maluginngilarput. Kisianni suliunnaaratta sakkortoorujussuanngorami. Aamma ernuttakkaluunniit isersimagaangamik igalaaq ammappat piaarnerpaamik matuupallattarpaat, taama oqaluttuarpoq Sofie Kielsen. Ajornartorsiut pillugu Simon Simonsen Kommune Kujallermi borgmesteri saqqummiussiffigaara, taannalu oqarpoq paasisinnaallugu taama naammagittaalliortoqarnera.

- Soorumani ajuusaarnarpoq. Ilisimaneqartutut Qaqortup Kommunerisimasaanilu mittarfittaarnissamik oqallinnermi, heliportip illunut qanippallaamik inissisimanera aamma Danmarkimi Silaannakkut Angallannermi Pisortaqarfimminngaanniit immikkut akuerisaalluni taamatut inissisimanera tunngavigalugu, Qaqortumi mittarfittaarnissamut ilaatittarnikuuvarput, taama nassuiaavoq Simon Simonsen.

Maannakkut innuttaasut peqataallutik oqallstilernermi neriuutiginerarpaa Naalakkersuisut Inatsisartullu suluusalinnut Qaqortumi mittarfittaarniarneq pimoorullugu suliniutigissagaat.

Kommune Kujalliup Air Greenlandimi pisortat ilaat, Niuernerpalaartumik ingerlatsinermi pisortaq, Udo Glasshoff, Qaqortumi ataasinngorpat ataatsimeeqatigissavaat, Kujataani angallanneq ataatsimiissutigissallugu.