Qulimiguullit qangattanngikkallassapput

Qulimiguullit Bell 212-it sisamat ilaasunik angallassisinnaajunnaarallarput, fabrikkimi sananeqarneranni ajoqutaasinnaasunik nassaartoqarmat.
novembarip 26-at 2010 12:42

Qulimiguullit taakku sisamat USA-mi sanaajupput, Bellip fabrikkianniillu nalunaarutigineqarpoq, USA-p Silaannakkut angallassinermi nakkutilliisoqarfiata qulimiguulinnik taamaattunik angallassineq unitseqqugaa.

Amerikami Bellinik tunisassiorfiup atortuni aalajangersimasuni serienormulinni tunisassiornermi kukkusoqarsimasinnaasoq nalunaarutigimmagu qulimiguullit angallassequsaajunnaarput. Nunatsinni illoqarfiit angallasseqqusaajunnaarnermik eqqorneqartut tassaapput Avanersuarmiittut, Uummannamiittut, Nuummiittut aamma Qaqortumiittut.

Qulimiguulinnut taakkununnga ilaasussaagaluit allatut angallannissaannik qinaasillutik Air Greenland-imi maanna ulappunneqarpoq.

- Uummannamiit ilaasussanut maanna umiarsuarmik attartorpugut. Kujataani ilaasut qulimiguulimmut allamut ilaallutik angallaneqarput. Nuummi ullumikkut Bell 212-nut ilaasussaqannginnera pillugu Nuuk eqqugaanngilaq. Avanersuarmi nunaqarfinnut angallassinissat ullumi taamaatiinnarneqarput, Air Greenland taama nalunaarpoq.

Atortut ajoqaasinnaasutut ilimagineqartut maanna Nuummukaanneqarput tassani missorneqassallutik.Air Greenland nalunaarpoq, qulimiguulinnut marlunnut taartissamaateqarlutik, naatsorsuutigineqarlunilu qulimiguullit marluk ullut marlussuit qaangiuppata angallasseqqissinnaalissasut.