Qulimiguullit nutaat pisiariniarpaat

Timmisartortitseqatigiiffik Air Greenland qulimiguulinnik nutaanik tallimanik pisaalerpoq. Qulimiguullit ukiorpassuarni atorneqartut S-61-it taartissaat AW139-inik taaguutillit, S-61-init sukkanerupput, inissaqarnerullutik aserfallatsaalineqarnerallu akikinnerullutik.
Allattoq Mads Lynge
februaarip 01-at 2008 06:20

Timmisartortitseqatigiiffiup Air Greenlandip siulersuisui decembarip qaammataani akuersipput, Air Greenland qulimiguulinnik AW139-nik tallimanik pisinissamik. Qulimiguullit nutaat pingasut ukiut marluk qaangiuppata pisiarineqassapput, sinnerilu ukioq 2012-imi.

Qulimiguullit S-61-it atorunnaariartortinneqarnerat ilutigalugu qulimiguullit Bell 222-t aamma atorunnaassapput.

Bell 222-t taartissaannik pisisoqassaaq, taamatuttaaq aatsitassanik ujarlernerni atorneqartussanik pisisoqassasoq, Sermitsiaq gl-ip nittartagaani allassimavoq.