Qulimiguullit nutaat marluk Air Greenlandip atsioqatigiissutigaat
Isumaqatigiissut piviusunngussappat, qulimiguullit nutaat taakku 2014-imi tunniunneqarsinnaassapput. Air Greenlandimi pisortap tullia, Christian Kjeldsen, ilisimatitsivoq.
Qulimiguullit tamatigoortuupput, 19-inik ilaasoqarsinnaapput, imaluunniit tonsinik aqqanilinnik useqarsinnaallutik. Sila qanorluunniit ikkaluarpat timmisinnaapput - issimasoqarluni angallassinerni annaassiniarnernilu atorneqarsinnaallutik imaluunniit usinik inuttanillu assartuisinnaallutik.
Qulimiguullilli taakku nutaat tunniunneqarsinnaanerannut apeqqutaassaaq Air Greenlandip niueriaasia, soorlu uuliasiortunut aatsitassarsiortunullu allanut.
- Niueqatigiinnermik isumaqatigiissut Air Greenlandip septembarip ulluisa aallaqqaataanni immikkut isumaqatigiissutaanit aallaaveqarpoq, Christian Kjeldsen erseqqissaavoq. Eqqarsaataavorlu suliffeqarfiup soorlu uuliasiortunut aatsitassarsiortunulluunniit sullissinermini naammassisai qanoq innersut, aamma suliffeqarfik useqarluni inuttaqarlunilu uuliasiortunut aatsitassarsiortunulluunniit angalassinermini nunarsuarmi piumasaqaatit malinnerai, Christian Kjeldsen erseqqissaavoq.
Taassuma oqarnera naapertorlugu Air Greenlandip qulimiguullit atorlugit niueriaasia qulimiguulinnik taakkuninnga marlunnik pisinissaanut apeqqutaasorujussuussaaq.
- Suliffeqarfiup ineriartornissaanut niuernermut isumaqatigiissut una aalajangiisuusorujussuussaaq, nunanummi allanut timmisartornikkut aqqutit annertusiartorput, Air Greenlandimi pisortap tullia, Christian Kjeldsen, oqarpoq.
