Qulimiguullip timmisinnaalernissaa pisortap naatsorsuutigaa

Qulimiguullip timmisinnaannginnera pisortap ajuusaarutigaa. Aaqqiissutissarli qanittunnguuvoq.
Assi © : KNR
maajip 15-at 2017 11:47

Inissisimaneq ajuusaarnarpoq, Air Greenlandilli neriuutigaa S-61, pisiarisimasartik, timmisinnaalernissaa ungasigunnaartoq, KNR-ip Sikorskimik 2015-imi pisiarineqarsimasumik suli timmisimanngitsumik saqqummersitsineratigut, Air Greenland tusagassiuutinut nalunaaruteqarluni taama allappoq.

Qulimiguulik 2015-imi pisiarineqarsimasoq, 2016-imilu marsimi piareersarneqalersimasoq Air Greenland KNR-imut ilisimatitsivoq. 

Atortorissaarutit ilaasa allagartaat amigaataanikuummata piareersarneqarnerali unitsinneqarallartariaqarnikuuvoq. Taakkuli inisseriarpata suliaq nanginneqassaaq, Air Greenland ilisimatitsivoq. 

 

Annaassiniaanermut tapertatut atugassatut qulimiguulik pisiarineqarnikuuvoq massakkuugallartorli Issittumi sakkutooqarfimmut isumaqatigiissummi ilaanngikkallarluni.

- OY-HUF-ip piareersarniarnerani killiffik ajuusaarnarpoq, aaqqiissutissalli piariingajalerput, pisortaaneq Michael Højgaard oqarpoq. 

Sikorski OY-HUF-mik taajuutilik 16,9 millionit koruuninit naleqarpoq.