Qulimiguulliit pigineqarnerat sivitsorniarpaat
Qulimiguullit Lynxit Kangilinnguani Sakkutooqarfiup alapernaarsuutaanit ilaatigut atorneqartartut, Danmarkimi illersornissaqarfimmiit politikerinillu qangali pilerigineqarput, tunineqariarlutik allanik taarserneqarnissaat neriuutigineqarluni.
Qulimiguulinnik pisinissaq Danmarkimi Sakkutuut Imarsiortut Qullersaqarfiata pisiassanut allattorsimaffiini danskit politikeriisa 2004-mi siullermik allappaat. Kangilinnguanili Sakkutooqarfiup maanna misissulerpaa qulimiguullit taakku pigineqarnerat aappassaa sivitsorneqassanersoq, qulimiguulinnik angallatini alapernaarsuutini atorneqartartunik koruuninik milliardilikkaanik pisinissaq kingumut kinguartinneqarsinnaanersoq eqqarsaatigineqalerluni. Aviisimi Berlingske Tidendemi tamanna allaaserineqarpoq.
Ukiup 2000-p missaani qulimiguullit timitaat taarserneqarput. Lynxit nunani allani atorneqartorujussuummata, atortuilu taarserneqakulallutik, atortunik sillimmatissanik pissarsiniarneq ajornakusoorsigaluttuinnarpoq.
Illersornermulli pisortap, Knud Bartelsip, Kangilinnguani Sakkutooqarfik tassa maanna qinnuigaa qulimiguullit maanna atorneqartartut pigineqarnerat sivitsorneqarsinnaannginnersoq misissoqqullugu. Qulimiguullit Lynxit siulliit ukiut 30-t matuma siorna Danmarkimi atorneqalerput.
