Qulimiguulinnik angallannerup akisuallaarnera Svanep isoraa

Kalaallit Nunaata ilaani silaannakkut angalanitsinni billetsip akiata pingajorarterutaasa marluk nunatta karsiata akilertaraa ippassigami radioaviisimi oqaluttuaraarput, tamannalu Namminersorlutik Oqartussat, Air Greenlandillu kiffartuussinissamik isumaqatigiissuteqarfiini pisarpoq.
Assi © : Branding Greenland
februaarip 04-at 2016 17:34

Kisianni Qeqertarsuup tunuani qulimiguulimmik angalanermi billetsit akii suli akisuallaarujussuartut, Siumut sinnerlugu inatsisartunut ilaasortaq Jess Svane isumaqarpoq.

Paragraf 37 naapertorlugu Naalakkersuisunut apeqquteqarnermini, nunatta ilaani qulimiguulimmut ilaalluni akit nunatta ilaanut sanilliullugit assigiinnginnerisa nassuiarneqarnissaat ujartorpaa.

- Qeqertarsuarmiit assersuutigalugu Aasiaat tungaannut 20 minutsit atorlugit qulimiguulimmik  timmisoqartartumi, sooq 2.600 koruuninik akiliissaanga, uterniarumalu 5.500 koruunit tungaanut aallaat akiliisariaqarlunga, taakkununnga akiliutigisama affangajai atorlugit Danmarkiliarsinnaagaluarlunga, Jess Svane KNr-imut oqarpoq.

Tapiissutillumi angipput.

Aamma atuaruk Kiffartuussinissamik isumaqatigiissuteqarfiusunut billetsit akiisa 2/3-lii pisortat akilertarpaat

Suka K. Frederiksen Siumut, paragraf 37 naapertorlugu aamma apeqquteqarpoq. Attaveqarnermut Naalakkersuisoq Knud Kristiansen akissuteqarluni oqarpoq, nunatta ilaani kiffartuussinermik isumaqatigiissuteqarfiusuni  billetsit akiisa pingajorarterutaasa marluk pisortanit akilerneqartartut.

Kisianni tassa pisortat tapiissusersuilluaraluartut, assigiinngisitsisoqartoq Inatsisartunut ilaasortap tusarsimavaa.

- Kujataani illoqarfiit akornanni qulimiguulimmik ingerlaarfiit isorartussusii, Qeqertarsuup tunuani illoqarfiit Ilulissat, Aasiaat Qasigiannguit Qeqertarsuarmilu isorartussutsit assigiinnangajappaat, kujataanilu akigitinneqartut Qeqertarsuup tunuani  angalanermi akigitinneqartut pingasoriaatingajaanik annersumik akeqarlutik, Jess Svane oqarpoq.

Jess Svane billetsit akii pillugit paragraf 37 naapertorlugu Naalakkersuisunut siorna maajimi arlaqartunik apeqquteqarpoq.

Aamma atuaruk Kiffartuussinissamik isumaqatigiissutit akuersissutigineqarput

Tassungalu akissuteqarluni Attaveqarnermut Naalakkersuisoq Knud Kristiansen oqarpoq, billetsit akiisa aalajangerneqartarneranut pissutsit arlaqartut.

 - Billetsinit isertitassat aalajangersarneqartarnerini qanoq ungasitsigisumut timmisartuussisarneq kisimi isiginiarneqarsimanngitsoq, kisiannili aamma billetsimut akiusup, atuisup akilersinnaasaa qanoq qaffasitsigissanersoq isiginiarneqarsimalluni, Knud Kristiansen siorna maajimi akissuteqarluni taama allappoq,  Qeqertarsuup tunuani qulimiguulimmik angalasut sooq akisunerusumik akiliisariaqartarnersut akissuteqarnermini annertunerusumik itisilerlugu nassuianngilaa.

Billetsinut akit ullumikkumut naleqqiullugit naligiinnerusumik agguarneqarsinnaanersut misissueqataarusuttorujussuulluni siorna maajimi allakkamini neriorsuivoq.

Inatsisartunut ilaasortap Jess Svanep paragraf 37 naapertorlugu Naalakkersuiusunut apeqquteqaataa februaarip aappaani nassiunneqarpoq, Naalakkersuisullu ullut qulit ingerlaneranni akissuteqarnissaminnut periarfissaqarlutik.