Qulimiguulinni timmisartortartutut ilinniartoqarsinnaalerpoq

18-it 35-llu akornanni ukioqaraanni, qulimiguulinnilu timmisartortartutut ilinniagaqarnissamik takorluugaqaraanni, tamanna maanna ammaanneqarpoq. Tassami Namminersornerullutik Oqartussaniit ilinniarnersiuteqarluni qulimiguulinni timmisartortartutut ilinniagaqarsinnaaneq pernaammik ammaanneqarpoq.
Allattoq Lotte Holm
marsip 31-at 2009 07:11

Qulimiguulinni timmisartortartunngorusullutik ilinniarnersiutinik qinnuteqartartut tamarmik Namminersornerullutik Oqartussanit maannamut itigartinneqartarsimapput, suluusalinni inuussutissarsiutigalugu timmisartortartunngorniartunut Namminersornerullutik Oqartussat timmisartortitseqatigiiffiullu Air Greenlandip isumaqatigiissutaat taamaallaat atuummat.

Quliguulinnili timmisartortartunngorusuttut ilinniarnersiuteqarlutik 2010-mi januaarip aallaqqaataanniit ilinniagaqarsinnaanngussapput, soorlu ilinniarnersiuteqarluni suluusalinni timmisartortartutut ilinniartoqarsinnaasoq. Timmisartortartutut ilinniagaqarneq siunissami iluaqutaasussaasoq upperalugu Naalakkersuisut taama aalajangiipput.

Inuussutissarsiutigalugu kalaallit timmisartortartunngorniartarnerat maannamut iluatsilluartarsimavoq, angusilluartoqartaqaarlu.

Qulimiguulinni timmisartortartutut ilinniarnerup annersaa USA-mi pissaaq, sivikinnerusumik Tuluit Nunaanniinnermik ilallugu. Ilinniarneq tamakkerluni qaammatini 14-ini ingerlanneqarsinnaassaaq.

Ilinniagaqarnerup 2010-mi januaarimi aallartinnissaa pissutigalugu qinnuteqarfissaq kingulleq tassaavoq 2009-mi juunip aallaqqaataat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq