Qulimiguulik ukiunik 55-inik pisoqaassusilik 2 millionilerlugu akiginiarneqartoq: Qangattarsinnaanngilaq
Air Greenlandip qulimiguuliutaa, Sikorsky S-61N, OY-HAF, Nattoralik imaluunniit silaannaap dronningia. Qulimiguulik nunatsinni attaveqatigiinnermi suliaqarluarluni kiffartuussisimasoq oqaluttuarisaanermilu ilaasoq, Air Greenlandip ukiuni 55-ini pigisimasaa nutaamik piginnittortaassaaq.
Nattoralik timmisartuutileqatigiiffimmut pisoqalivallaarpoq.
Qulimiguulik nunatsinni siullerpaamik 1965-imi apriilip ulluisa qulingiluaanni Kangerlussualiarluni angalaqqaarpoq. Aqaguanilu Nuummut timmereerluni atorneqarnissamut piareerpoq.
Qulimiguulik ilaasartaatitut, ujaasinermut annaassiniarnermullu ilaatigut atorneqarsimavoq.
Qulimiguulik qangattarsinnaanngitsoq 2 millionit koruunilerlugu
Silaannaalli Dronningi ukiuni kingullerni timmisartuutileqatigiiffiup timmisartuussiviani ukiuni kingullerni soraarninngorsimalluni S-61-inut allanut sillimatitut atorsimavoq. Qulimiguullip aserfallatsaaliorniarnissaa silaannarmiitinnissaalu akilersinnaanngitsoq, Air Greenland isumaqarpoq, taassumalu sillimmatissai akitsoraluttuinnarlutik.
Qulimiguulik maanna tunineqassaaq qulimiguulinnillu nutaanerusunik taarserneqarluni.
Nattoralik maannakkutut itsilluni qangattarsinnaanngilaq. Air Greenlandip timmisartuusiviisa ilaanni uninngaannarluni suliarineqarnissaminut utaqqiinnarpoq. Air Greenlandip qulimiguulik suliassaasutut neqeroorutigalugu 2 millionit koruunilerlugu tuniniarpaa.
Kialli qulimiguulik pisoqaq qangattarsinnaanngitsoq pisiarissavaa?
- Kingoraartissat akitsoriartorneri, kisianni suli naleqarami, kingoraartissatut atorneqarsinnaagami suli, taavalu aamma eriaginartuummat aamma taanna naleqarami. Taamaasilluni aamma tunineqarsinnaalluni, Air Greenlandip attaveqaqatigiinermut pisortaa, Masaana Egede oqarpoq.
Tunineqarnissaa naatsorsuutigigaat
Taassuma Nattoralik piariniarneqarsimanersoq oqaaseqarfigerusunngilaa, kisianni nunatsinnit nunaniillu allanit soqutiginnittoqarsimanerarpaa ilanngullugulu qulimiguuliup nutaamik inuttassarsinissaa naatsorsuutiginerarpaa.
- Ilimagilluinnarparput tunineqarnissaa, Masaana Egede oqarpoq.
Timmisartuutileqatigiiffiup qulimiguulimmik tuniniaanera Air Greenlandip Facebookimi quppernerani qisuariarfigineqarpoq. Qisuariartut arlaqartut qulimiguullip sooq katersugaasivimmiitsilerneqannginnera apeqqutigaat. Katersugaasivimmiilernissaali Air Greenlandip akisussaaffiginngikkaa, attaveqatigiinnermut pisortap oqaatigaa:
- Uagut timmisartuutileqatigiiffiuvugut, timmisartornerlu suliffigalugu. Katersugaasivimmi suliaqartut immaqa taanna pikkoriffiginerussavaat, Masaana Egede oqarpoq.
Qulimiguulik qanoq sivisutigisumik suli tuniniagaassanersoq suli nalunarpoq, Air Greenlandilli tuniniaaneq ingerlaavartumik naliliiffigisassagaa, Masaana Egedep nassuiaatigaa.
Air Greenlandip, imaluunniit taamani taaguutaatut Grønlandsflyp qulimiguullit S-61-it katillugit 12-it piginikuuai, Air Greenlandillu qumiguullit S-61-it arfineq-pingasut piffissami ataatsimi ataatsikkut pigisimallugit. Taakkunannga maannakkut marluinnarnik peqarpoq.
Timmisartuutileqatigiiffiummi qulimiguullit nutaat nutaaliaanerusullu marluk SAR-imik (Search and Rescue aaqq.) annaassiniarnissamut atortussatut pisiarinikuuai. Qulimiguullit taakku Airbus H225-upput.
Qulimiguullit nutaat marluk, atornikuutillugit pisiarineqartut katillugit 200 millionit koruunit missaannik akeqarput.
Taakku nunatsinnut minnissaata tungaanut Nattorallip qatanngutaa, Kussak suli atorneqarpoq SAR-imillu (Search and Rescue aaqq.) Illersornissaqarfimmut isumaqatigiissut ingerlallugu.