Qulimiguulik nakkarsimasoq nunamukaanneqartoq

Qulimiguulik Narsap eqqaanut ippassaq nakkartoq maanna nunamukaanneqarpoq.

Kalaallit Nunaanni pigaartut pisortaat, Anette Ostenfeldt paasissutissiivoq.

Narsamit kujammut kangimut 13 kilometeritut ungasitsigisumit ajutoortoqarsimaneranik kalerrisaarummik ippassaq pingasunngornermi ualikkut marluk qaangerlugit tanneq marluk missaanni tigusaqarsimallutik politiit Naviair Flight Information Centerilu tigusaqarsimasut politiit pingasunngornermi unnukkut tusagassiuutinut nalunaarutigaat.

Issittumi Sakkutooqarfik suleqatigalugu annaassiniarneq aallartinneqarpoq, qulimiguulimmillu annaassiniartartumik ajutoorfiup nalaanukartitsisoqarluni, tassanilu qulimiguullip aquttua imaani nassaarineqarpoq.

Angut danskiusoq, 40-nik ukiulik timmisartumi ingerlatsisuusoq imaanit qaqinneqarpoq Qaqortumilu napparsimmavimmukaanneqarluni passunneqarpoq.

Qulimiguulimmik ingerlatsisup timaa nillortingaatsiarsimasoq

Qulimiguulimmi aquttoq inuunerminik navianartorsiunngitsoq Kalaallit Nunaanni Politiit paasissutissiissutigaat. Angulli annaanneqarami timaa nillortingaatsiarsimavoq.

Qulimiguulimmi allanik issimasoqanngilaq.

Kalaallit Nunaanni Politiit pigaartuisa pisortaat ippassaq misissueqqissaalernermut tunngatillugu ullaaq manna nutaarsiassaateqanngilaq.

Ajutoortoqarsimatillugu misissuisartut politiillu pisumik misissueqqissaarnermik aallartitsipput.