Qulimiguulik Ilulissani upernassaq apriilimi nakkartoq, arlalinnik motoorimini kukkuneqarsimavoq, taama aviisi politiken.dk allappoq.
Motoorip qanoq ajoquteqartiginera Ajutoornerit pillugit ataatsimiititaliap misissuigallarneranit erserpoq.
Air Greenlandip qulimiguuliutaa taamani nakkarami meterit marlussuinnaat portutigisumit nakkarpoq, nunamut aputilimmut toruloorluni, issimasullu 24-it tamarmik ajoratik qulimiguulimmit niusinnaasimapput.
Motoorip misissornerani paasineqarpoq uuliamik sorujuiaat filteri milissimasoq, kaavittullu turbinet ilaat kukkusunik boltilersorneqarsimasoq. Maskinap atortui aamma kukkusumik inissinneqarsimapput, kiisalu motoorip ilaa uuliaterneqarsimanani.
Misissuinerup aamma takutippaa, qulimiguulik kingullermik misissorneqarnerminit nalunaaquttap akunnerini 27-ini, atorneqarsimasoq.
Ajutoornerit pillugit ataatsimiititaliap misissuinera suli naammassinngilaq.
