Avannaata Qimussersua: - Qulakkeerakku anngullunga, pikkunaq, Salik Fly oqarpoq.
Taassuma Ilulissani anngunniulluni unammisuni nukarlermut tulliulluni anngukkami angusani tupaallaatigaa.
- Pikkunaq, nuanneq. Assorujussuaq tupannarlunilu nuanneq, nuanneq
- Tikikiartornermi qanilliartornermi qulakkeerakku anngullunga, pikkunaq. Qanorluunniit oqassaluni nalunarpoq, 17-inik ukiulik Salik Fly oqarpoq.
Taanna meeraallunili qimussertarpoq, aappassaaneerlunilu Avannaata Qimussersuanut unammeqataasussanngorluni. Avannaata Qimussersuanummi ukiut marluk matuma siorna umanneqataarngaarpoq.
Salik Fly anngunniunnermi angusarissaarnissani naatsorsuutigereersimavaa, tassami ilaquttamini isertitsilaarnissani pilersaarutigeersimallugu.
- Qanorluunniit inissikkaluaruma kaffillertussaagama, tamulugassallu. Piareersarnikorujussuugama kaffillerpunga, tamulugassallu ilaquttagut isillattaarlutik.
AAMMA ATUARUK Coronamut aarlerineq: Avannaata Qimussersuaaraa taamaatinneqartoq
Avannaatali Qimussersuanut anngunniaraanni qimmit sungiusarluarnissaat nerisilluartarnissaallu pisariaqartoq, Salik Fly oqaluttuarpoq. Taassuma qimmini aasakkut neqinik nerisilluartarpai ukiakkullu unammiffissannguleraangat nerisai allanngortittarpai.
- Neqi oqimaatsuugami, taava taakku pisiniarfinneersut oqinnerullutik iluarnerusarput. Qimuttussaatillugit uanga taakku iluarinerusarpakka.
Avannaata Qimussersuani inersimasut 44-t unammeqataassapput.
Avannaata Qimussersuani meeqqat sukkaniunnerat Avannaata Qimussersuaaraa marlunngorneq martsip 24-at KNR-TV-mi toqqaannartumik aallakaatinneqassaaq.
Aamma inersimasut Avannaata Qimussersuani sukkaniunnerat arfininngorneq martsip 28-at aamma toqqaannartumik aallakaatinneqassaaq.