Qulaajaasussanik pilersitsisoqalerpoq
Afrika kujallermi pissutsinik qulaajaasussaatitat aaqqissuunneqarnerat malillugu Canadami naggueqativut qulaajaasussanik pilersitsiniarput. Qimmit qimuttut 20.000-t missaanniitut 1950-kkunniit 70-kkut tungaannut politiinit toqorarneqarsimasut pillugit qulaajaasoqassaaq.
Politiit qimminik toqoraanernut akisussaasimanngitsut siornatigut nalunaarusiortoqareerpoq – naggueqatitta suliniaqatigiiffiinit nuannnarineqanngeqisumik. Nunap inuii avinngarussimasumi najugaqaratik illoqarfinni eqimmallutik najugaqarnissaat anguniarlugu pisortat qimminik taama toqoraasimasut naggueqatitta kattuffii nalunaaruteqartuartarput.
Naggueqatitta kattuffiat, Qikiqtani Inuit Association, pissutsinik qulaajaasussaatitanik pilersitsiniarluni eqqarsaateqarpoq – qulaajaasussaatitat sulinerat ukiumut 10 millioni koruuneqassaaq. Qulaajaasussaatitanik pilersitsinissaq kattuffiup Nunatsiaq Newsimut ima tunngavilersorpaa:
- Nunasiaanerup nalaani nunaqavissut pisinnaatitaaffiinik unioqqutitsisarnerit qulaajaasussaatit misissuiffigisassavaat, tamannalu sakkussatsialaassaaq.
Afrika Kujallermi ammip qalipaataa tunngavigalugu immikkoortitsinerup unitsinneqariitsiarnerata kingorna pissutsinik qulaajaasussaatitaqarneq Nelson Mandelap suliniutigeqqaarpaa.
Takunnittuusimasut qulaajaasussaatitanut sassarlutik nassuiaasarnissarput. Tamatuma kingorna ajortuliorsimasut iliuuseqartussaagaluarlutilluunniit isiginnaaginnarsimasut ajortuliorfigitittumit isumakkeerfigineqartarput.
