#IQ2018 Qulaajaalluartoqarnissaa partiit inassutigaat
Suleqatigiissitaliornissaq pisariaqartoq Demokraatit isumaqarput.
-Uagut miserratigissangilarput pitsaanerpaaq anguniarlugu soorunami suleqataanikuugatta. Miserratigissanngilarput taanna naalakkersuisooqatigiinni kukkuluttorneq, taamaammat suleqatigiissitap aaqqissuunnerani angallanneq qulimiguulimmik attartornikkut aaqqiiffigineqarnissaa tuaviornerpaamik sulissutigerusupparput, Demokraatineersoq Nivi Olsen taama oqarpoq.
Demokraatit naalakkersuisunngortitsissagaluarunik suliassamittut siulliit ilaattut angallannerup ungasissumut isigaluni pilersaarusiorfigerusullugu tikkuarpaat. Suleqatigiissitsisut aamma Partii Naleqqap angallannikkut nutaamik aaqqissuusseqqinnissaq kissaatigaat. Angallanneq akisuallaartoq Nunatta Qitornai naliliipput. Ilaasartaat avannaani angalanermini Ilulissanut killiinnarnani Upernavimmut tikittalernissaa Atassutip siunnersuutigaa, Siumukkullu isumaqarput Nanortalimminngaanniit qanoq avannarpasitsigisumut angalasinnaanera misissorneqartariaqartoq.
Inuit Ataqatigiit isumaqarput nalakkersuinikkut alloriarfissami tullermi kiffartuussinissamut isumaqatigiissutit inuiaqatigiit kissaataannik matussusiisuusariaqartut. Aqqaluaq B. Egede ima oqarpoq:
-Qulaaniit aqutsineq sakkortungaarmat Diskolinemik kingullermik isumaqatigiissusiortoqarmat naalakkersuisooqatigiit isapput angallannerlu sequmilluni. Taamaammat isumaqatigiissusiunnginnermi qulaajaalluaqqaarluni sulinissaq IA-miit tunngavileqqikkusupparput.
