Qujaukitsup isornartorsiorneqarnini paasiuminaatsippaa
Vittus Qujaukitsoq tunulequtaminut kusanaatsuliorpoq, Nunatsinnut tunngatillugu angusarissaarnissaq pinnagu oqaatsinik sakkortuunik atuivoq. Inuit Ataqatigiit nunanut allanut tunngasunut oqaaseqartartuat Ane Hansen Qujaukitsoq pillugu taama oqarpoq.
Vittus Qujaukitsorli nunanut allanut tunngasunut naalakkersuisuunermini eqqortumik suleriaaseqarsimalluni isumaqarpoq.
- Naalakkersuisutut sulininni ataatsimiititaliat susassaqartut Naalakkersuisullu ingerlaavartumik ilisimatittarlugillu akuutittarnikuuakka. Taamaattumik Inuit Ataqatigiit uparuartuinerat tupigaara, tunngavilersuutiginiagaallu paasiuminaatsilluinnarlugit, Vittus Qujaukitsoq Ane Hansenip isornertorsiuinera pillugu taama oqarpoq, nangillunilu;
- Minnerunngitsumik peqatigalunga ataatsimut oqaaseqaat apriilimi atsiorsimasaanni ilaatigut oqariartuutigineqartoq suliat Pituffimmut, Camp Centurymut Illersornissamut isumaqatigiissummut tunngasut ataatsimoorfigineqarnerat suaarutigineqartoq Ane Hansenip atsiorsimasani ullumikkut qanoq isumaqarfigineraa paaserusunnassooq, Qujaukitsoq apriilip qulingani Ane Hansen peqatigalugu Illersornissamut Isumaqatiguussummik 1951-meersumik isornartorsiueqatigiinnertik eqqarsaatigalugu oqarpoq.
AAMMA ATUARUK IA Qujaukitsumut sakkortuumik isornartorsiuisoq
Taassuma aamma oqaatigaa Danskit Naalagaaffeqatigiillu pillugit nipangersimaannarusunnani eqqortumillu periuseqarsimalluni.
- Nunatta erseqqissumik piumasaqaateqartumik saqqummertarnissaa pisariaqarpoq. Maniguulluni nipangersimalluni pinissaq qangali qaangiutereernikuuvoq,
AAMMA ATUARUK Danmarkip anneruniarnera aserorsaataalluinnarpoq
Inuit Ataqatigiit sakkortuumik isornartorsiuinerat Inatsisartunik qinersisoqangajalerneranik aallaaveqartoq Qujakitsoq isumaqarpoq.
- Qinersinissaq qanittuarannguanngorsimammat taamatut qisuariaateqartut isumaqarpunga, taamaattumik uivernertut nalilerusuppara,Vittus Qujauktisoq oqarpoq.
AAMMA ATUARUK Vittus akerliugami naalakkersuisuujunnaartoq
