Assi: KNR

Qujaukitsoq nuna tamakkerlugu takornariat ornigarfissaannik pilersitserusuppoq

Takornariat ornigartarfissaat centerit tallimat Kalaallit Nunaanni nunap immikkoortuini assigiinngitsuni sananeqarnissaat oqaluuserineqassaaq.

Takornariat pillugit periusissiap ilaattut Naalakkersuisut ukiamut inatsisartut ataatsimiinneranni saqqummiussassaanni takornariat ornigartarfissaat ilaapput, Inuussutissarsiornermut Naalakkersuisoq Vittus Qujaukitsoq oqarpoq.

Nunarput tamakkerlugu eqqarsaatigineqarpoq.

Tassalu avannaani nunatta qeqqani kujataani tunumuli, Qujaukitsoq oqarpoq.

Aamma atuaruk Isfjordscenter nunap sinneranut isumassarsiorfiussaaq

- Tassungalu atatillugu takornarissat ornigarfiini nunap immikkoortuini assigiinngitsuni pilersitsinissaq, Vittus Qujaukitsoq oqarpoq.

Illorsuassap ilusaa assilillugu sanaartortoqarniarpoq

Takornariat ornittagassaat siulleq maanna piareersarneqarpoq. Illorsuaq Ilulissat kangianiittussap ilusaa assilillugu nunatta sinnerani sanaartortoqarniarpoq Namminersorlutik Oqartussat aamma Realdania aningaasaliisoralugit.

- Namminersorlutik Oqartussat taavalu aningaasaliisartut namminersortut suleqatigiinnerisigut taanna suliniut iluatsippoq, Vittus Qujaukitsoq oqarpoq.

Aamma atuaruk Borgmesteri aningaasaliiffigineqarniartunut mianersoqqusisoq

Takornarianit soqutigineqalernissaat siunertaapput

Takorniariat ornigartagassaat nunap immikkoortuini assigiinngitsuni takornarianit soqutigineqalernissaannik siunertaqassapput, nunap immikkkoortuini assigiinngitsuni immikkuullarissuseqartut soqutinartunngortillugit.

Kujataani takornariat ornigartagassaat nunarsuarmi eriagissassatut qinnuteqarnissamut ataqatigiissarneqarsinnaasoq Vittus Qujaukitsup periarfissatut isigaa.

- Savaateqarneq, minnerunngitsumillu aamma nunap sananeqaataa pillugu geologimut tunngasut kujataani annertuumik aamma naapitassaapput, taamaattumik qallunaatsiaaqarneq, nunaateqarneq nunallu sananeqaataanik tunngasunik imaqarnissaa taanna takorloorneqarsinnaavoq, Vittus Qujaukitsoq oqarpoq.

Aamma atuaruk Visit Greenlandip Ole Dorph paasisinnaanngilaat

Qeqqani uumasunik takornariarneq

Nunatta qeqqani Kangerlussuarmi Arnangarngup qooruata nunarsuarmi eriagissassanngortinneqarnissaa Vittus Qujaukitsup taavaa, aamma nunap sananeqaataa inuussutissarsiutillu takorluukkanut pinngartinneqartunut ilaapput.

- Kulturikkut eriagisassanik Arnangarnup qoorua assersuutiginnarlugu qangarsuaaniit siulitta piniariartarfigisimasaani eriagisassaqarpoq taannalu aamma soorunami UNESCO-mut aamma atatillugu tammatsaaliugassatut eqqarsaatigineqarnera aamma mianerisassaraarput, kisianni taassuma saniatigut inuussutissarsiornikkut nunallu sananeqaataanut tunngasunik ornigarfiup imaqarnissaa taanna takorloorparput, Vittus Qujaukitsoq oqarpoq.

Maniitsup eqqaani qipoqqaat takornarianit takuniarneqarsinnaanerat takorluukkanut ilaasoq inuussutissarsiornermut Naalakkersuisoq Vittus Qujaukitsoq oqarpoq.

Aamma atuaruk Realdania Ilulissat kangerlua pillugu illorsuassamut 75 millioninik aningaasaliivoq

Tunumi piniartuuneq aamma kulturikkut immikkuullarissutsip nittarsaanneqarnissaa takorluukkanut ilaavoq.

- Tunumi, imaluunniit Kangiani, kulturikkut allaanerussuteqarnera aamma taanna takornariaqarnikkut nittarsaassinissamut atorluarneqarsinnaasoq, aamma nunap immikkoortuini soorunami allani taamatut immikkuullarissusillit nunap immikkoortui aamma taamatut nittarsaassinermi atorneqarnissaat takorloorparput, Vittus Qujaukitsoq oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat