Qujaukitsoq Lyngelu Oqalliffimmi aporaatingaatsiartut
Oqallisigisaat tassaavoq ICC-ip suliniaqatigiiffittut atuunnera. Naalakkersummi ICC-mut aningaasat millionilikkaat ukiuni tulliuttuni tapiissutigisartagassatik ikiliartuaartillugit nungutsivinniarlugit aalajangiussaqarnikuupput.
- Uani ICC nammineq isummersorluni suliniutinut, soqutigisanut aalajangersimasunut aallussiniarnera, uanga tulluartuusutut isiginngilara, Vittus Qujaukitsoq oqarpoq.
Oqallinnermi Vittus Qujaukitsup isertuutinngilaa ICC-mut tapersersuinut ilaanginnini.
- Taakkua tunuliaqutaasut qiviarutsigit isumaqarpunga pissutissaqartoq maluginiassallugu aningaasarsiorneq niuernerlu eqqarsaatigalugit tassuunakkut naapertuutinngitsumik ICC sulisoq, Vittus Qujaukitsoq oqarpoq.
Taassumami Naalakkersuisullu kissaatigivaat Nunatta Karsianit ICC-mut tapiissutaasartut 4 million koruunit ukiut arlaqanngitsut qaangiuppata tunniunneqassaassasut ICC-lu aningaasaateqarfinnut kisimi isumalluuteqalersillugu.
- Uagut pikkorinnerpaavugut taamaliornissamut. Aammalu takutereerpagut aamma takusinnaassavaat 2012-mi 2013-milu taakkua naatsorsuutit malillugit qanoq isikkoqartoq, Aqqaluk Lynge oqarpoq.
ICC piviusimanngikkaluarpat uuliasiorniarluni pilersaarutinut isornartorsiuinerit annikinnerusimassangaluarput, aamma avanersuarmiut pinngitsaalillugit nuutsinneqarsimanerat eqqartorneqarsimassanngikkaluartoq, inatsisitigullu ataataqanngitsut taama pineqarsimassanngikkaluartut ICC-p præsidentiata erseqqissaatigai. Eqqaasitsissutigalugulu ICC-ip Issittumi Siunnersuisooqatigiinni, Naalakkersuisuniillu matunneqarsimasuni ataatsimeeqateqartarnerpassuatik.
Eqqaasissutigineqartut ilagaat nunat tamalaat piniarnermut politikkiannut akuusimaneq. ICC-mmi oqariartuuteqartarneratigut naggueqatigiit Inuit ullumikkut puisinik piniarsinnaapput tuniniaallutillu.
- Isumaqarpunga una ataasiinnarmik taamatut nalilissallugu ajorluinnaqqissaartoq. Pissutigalugu inuttut pisinnaatitaaffigut aamma Namminersorlutik Oqartussat suliarisinnaanngisaat arlariippassuit suliaraagut, Aqqaluk Lynge oqarpoq.
Oqallinnermi Vittus Qujaukitsup ICC Naalakkersuisut anguniagaannut akerlilersuisutut pasillerpaa. Kisianni Naalakkersuisunut ilaasortaq isornartorsiuinermini tigussaasunik saqqummiussaqanngilaq, isornartorsiuinerlu ICC-p tapiissutinik atueriaasianut sangutinneqarluni.
- Uani Naalakkersuisut iliuusaat isigineqartariaqarpoq ICC-mut mianersoqqusinertut, Vittus Qujaukitsoq oqarpoq.
Kisianni tassa ICC-ip isornartorsiuisarnera pissusissamisoortoq Aqqaluk Lynge oqarpoq:
- Uagut pisussaanngilagut Naalakkersuisut sutigut tamatigut iliuusissaat anngaassallugit.
Kisianni tassa ICC aningaasartuutaavallaartoq Vittus Qujaukitsoq isumaqarpoq:
- Aningaasat sumut atorneqartarneri ersarissumik ammasumillu saqqummiunneqarsinnaasariaqarput. Aamma apeqquserneqarsinnaasariaqarpoq ICC-p suliat suut pingaartillugit atuutsissanerai, Vittus Qujaukitsoq oqarpoq.
Aqqaluk Lyngep ICC-ip ullutsinnut Namminersorlutik Oqartussaanerup nalaanimut naleqqussarlugu nutartertariaqarsinnaanera nassuerutigaa, kisianni suliniaqatigiiffittut nutarterneqarnissaanut nammineq akisussaasuunnginninni oqaatigalugu.
ICC ullumikkut 4 million koruuninik tapiissutisisarpoq, Inatsisartut FN-ip nunat inoqqaavinut aalajangersagaa 80-kkunni peqataaffiginiarlugu aalajangermatali.
Oqalliffiup kalaallisut tv-kkut aallakaateqqinneqarnera unnugu nalunaaqutaq arfineq-marlup qeqqanut takoqqissinnaavat.
Radiokkut aallakaateqqinneqarnera qulingiluanut tanneq pingasuniit tusarnaarneqarsinnaasalluni. Oqalliffimmi oqallitsisisuuvoq Nûno Isbosethsen.
