Qujaukitsoq: isornartorsiuisut oqaaserisimasatik namminneq akisussaaffigaat
Aningaasanut inatsisissatut siunnersuut tassungalu attuumasut allat naalakkersuisunut ilaasortaqatiminit inatsisartunilu ilaasortanit Siumumeersunit isornartorsiorneqartareertoq, Aningaasaqarnermut Naalakkersuisoq Vittus Qujaukitsoq taama maanna oqarpoq:
- Aningaasanut inatsisissatut Siunnersuut Naalakkersuisuni ukioq ilivitsoq missaani piareersareerlugu saqqummiunnikuuara, taamaattumik imarisaani immikkuualuttut pillugit naammagittaalliortoqassappat taakku nalilersuisut isumartik namminneerlutik nassuiartariaqassavaat.
Naalakkersuisut Aningaasanut Inatsisissatut Siunnersuutaanni atuarneqarsinnaavoq sinerissap qanittuani aalisarnerup nutarteriffigineqarnissaa Naalakkersuisut kissaatigigaat, aalisakkanik akitsuusersuisalernissaq isumaliutaannut aamma ilaapput.
Tamanna tunngavigalugu suleqatigiissitamik misissuisussamik siunnersuusiortussamillu Naalakkersuisut pilersitsisimapput, taannalu aalisarnermut attuumassutillit peqataaffigaat.
Suleqatigiissitarli nammineq januaarimi naalakkersuisunngunngikkallaramili oqaluuserineqarsimammat ilisimasaqarfigisimanagu Aalisarnermut Naalakkersuisoq Finn Karlsen ippassaani oqarpoq.
- Paasivara uanga sioqqullunga, Naalakkersuisunngunngikkallarama tamanna oqallisigineqarsimasoq. Naalakkersuisuuninni taama ittumik oqaluuserisaqarnikuunnginnatta, Finn Karlsen oqarpoq.
Taamaakkaluartoq Aningaasaqarnermut Naalakkersuisoq Vittus Qujaukitsoq Radioaviisimut juunip 23-ani allappoq suleqatigiissitamik pilersitsisimallutik, suleqatigiissitap aalisarneq tamaat misissuiffigissagaa januaarimilu 2015-imi suliani naammassissagai aammali Inatsisartut 2015-imi Upernaakkut ataatsimiinneranni inatsisitigut allannguutissatut siunnersuummik saqqummiussaqarumaarluni allappoq.
Naalakkersuisunut illuatungiliuttut, Inuit Ataqatigiit, isumaqarput Naalakkersuisut erseqqissaateqartariaqalersut, taamaaliornianngikkunillu qinersisoqarnissaanik suaarutiginnittariaqartut.
- Paatsiveqanngillat. Paasiinnarparput oqaloqatigiinneq ajortut aamma kikkut sunik suliaqarnersut ilisimanngikkaat. Politikkertik ataatsimoorlutik aallutinngikkaat aamma paasiinnarparput. Allatut ajornaqaaq erseqqissaassuteqarnianngikkunik qinersisoqarnissaanik suaarutiginnittariaqarput, IA-meersoq Naaja Nathanielsen ippassaq taama oqarpoq.
Vittus Qujaukitsoq tamatumunnga akissuteqarluni oqarpoq, Naalakkersuisut Aningaasanut Inatsisissatut Siunnersuutaat Naalakkersuisut ataatsimoorlutik isummerfigereermassuk ataatsimoorlutik siunnersuutaattut isigisariaqartoq, paatsuungasoqarneranullu tusagassiorfiit akisussaasuusut.
- Isumaqarpunga oqallinnerup torinngitsumik ingerlalerneranut peqqutaasoq tusagassiutininngaannit apeqqutit aningaasanut inatsisissap imarisaanut tunnganngitsut sammineqarnerannut aallaaveqarnerusut.
