Quiguit nappaatipiloqarnerlutit paasissavat
Maannami innuttaasut, quiffissaminnik SANA-mut aallertariaannanngornikuupput. Ilinniartulli ukioq atuarfiusoq nutaaq aallarnerfigalugu ilinniarfimminni quiffissanik tigusisariaannanngussapput, qoortillu misissugassaq aamma ilinniarfigisaminnut tunniussinnaanngussallugu.
Taamaaliornikkut inuusuttut amerlanerit, misissortikkusunnerulersinnaananissaat Dronning Ingridip napparsimavissuani nakorsaanerup Jesper Olesenip neriuutigaa.
- Apersuuserneqarsinnaanngitsumik inunnik napparsimaveqarfimmiit ikiuerusuppugut. Nalunngilarpummi inuusuttut inuusuttuaqqallu kinguaassiutimikkut nappaateqartut amerlavallaartut. Taamaattumik nutaamik iliuuseqarniarpugut, Nuup peqqissaaviani nakorsaaneq Jesper Olesen oqarpoq.
Kinguaassiutitigut nappaatinut klamydiamut gonorremullu misissortinniaraanni qooq aqqutigalugu misissortissinnaanneq ukiup ataatsip matuma siornali Nuummi atorneqarsinnaalerpoq, tamannalu amerlasuunnit atorluarneqarpoq.
Tamanna siornatigut misissueriaatsimut sanilliullugu annernannginneruvoq tujorminannginnerullunilu.Taamaakkaluartoq inuusuttuaqqat quiffissamik aallernissartik tunniussinissartillu kanngugalugu kajumigivallaarneq ajorpaat. Taamaammat Nuummi peqqinnissaqarfiup Ilinniarnertuunngorniarfik Niuernermillu Ilinniarfik suleqatigilissavai. Ilinniartut ilinniarfimminni quiffissamik pissarsisinnaanngussapput. Taamalilluni inuusuttuaqqat amerlanerit kinguaasiutitigut nappaateqarnersut misissorneqarsinnaalissappput.
- Ilinniartut uatsinnut attaveqarluarnissaat piumaqaarput. Inuusuttullu misissortinnissaminnut kanngusuttarpata tamanna iliuuseqarfigerusupparput. Unali pingaaruteqaqaaq; tassa inuup kinguaassiutitigut nappaateqarnerluni misissortittarnissaa, Jesper Olesen oqarpoq.
Kinguaasititigut nappaateqarnerluni paaserusukkaani, misissuutinik ilinniarfigisamini aallinassapput.
- Ilinniartut misissugassanik tunniussinermini, allakkap puuanut quiffigisimasani ilissavaa tassanilu atini, oqarasuaatip normua inuullu normua nalunaarsussallugit. Taamaalilluta kinguaasititigut nappaateqarnermik misissukkap inernera, inuttaanut nalunaarutigisinnaanniassagatsigit, Jesper Olesen oqarpoq.
Jesper Olesennip ilanngullugu oqaatigaa, aallaqqaammut Nuummi ilinniarfeqarfiit aallarniutaassasut, neriuutigaluguli illoqarfiit allat aamma taamaliorsinnaannissaat.
Ilinniarfeqarfinni kinguuassiutitigut nappaatinut misissuutinik tunioraasalersinnaannissaq, Qaqortumi Niuernermik Ilinniarfimmiit tapersersorneqalereerpoq. Niuernermik Ilinniarfimmilu aperineqassagunik, ilinniartuminnut agguaassalerusunnersut, piumalereerlutik. Qaqortumi Niuernermik Ilinniarfimmi pisortaq Torben Hansen, taama oqarp0q.
Ajornannginnerpaamik misissortissinnaanneq orniginarpoq, taamaammat ilinniarfigisami atortussanik pisinnaagani, sulisullu kikkuusut nalunagit taava ittuukuluttoraqani pissaaq. Taamaammat taamaliortoqarsinnaalernissaa, maani Niuernermik Ilinniarfimmiit tapersersorparput, taamatullu aamma ikioqataarusuppugut kinguaasiutitigut nappaatit annikillisinneqarnissaanut.