Quiasaarisartoq Nuummut tikeraarpoq

Jan Gintberg upernalerneranili Danmarks radiomut aallakaatitassioqattaarpoq. Aallakaatitassiani  Danmarkimi illoqarfiit avingarusimanerulaartut ilaatigut quiatsannartussarsiorfigalugit paasisassarsiorfigisarpai. Illoqarfeeqqanut nikaginnissinnaasarneq allanngorniarlugu taamaasiorpoq.

Aallakaatitassiani quiasaarisartup ullualunnguit ingerlaneranni, tikeraarfimmini innuttaasut suliffeqarfiillu paasiniaaffigisarpai, aallannginnerminilu paasisani quianartussarsianilu tunngavigalugit tikeraarfimmi katersortarfiani innuttaasunut quiasaarisarluni.

Maanna Nuummut aallakaatitassiorniarluni tikiinnaqaaq. Neriniartarfeeqqat ilaanni aallakaatitassiassaminut ilanngussassaminik immiussisoq naapipparput:

- Erniinnannguaq Nuummi arabiamiutuat ilaat, Wasim Nuummi inuunera pillugu apersussavara. Ilaatigut quianartunngorsaaniarlunga quianartunik sianiippaluttumik aperisassavara, soorlu uppertuussappat maanngaaniit Mekkap tungaanut saalluni qinuleraangami sumut sammisarnersoq, Jan Gintberg nassuiaavoq.

Nuummiinnermini illoqarfimmi takusani allanartut takussangatissimanngisaalu ilaatigut aallakaatitassiami quiatsaammernartunngortilaartarlugit saqqummiukkusunnerarpai.

Tikitsinnani Nunarput pillugu nuannersuinnaanngitsunik tusagaqartarsimanini pissutigalugu Nunatsinni pissutsit allatorluinnaq takorloorsimanerarpai. Nassuiaavorlu Nunarput tusarsimasamisulli taama ajortiginngimmat tikeqqaarami tupaallassimalluni:

- Innuttaasut akornanni inuiaqatigiittut pitsaasumik ingerlariaqqikkusuppalaartumik anersaaqarneq, inoqatinut qallunaanullu pisuutitseqattaarneq pisimasunullu qaangiunnikunut qaangeerusussuseq malugigakku nuannersumik tupaallaatigaara, quiasaarisartoq ilumoorsaarpasilluni oqarpoq.

Illoqarfinnut aallakaatitassioriartorluni tikikkaangami qimerluuerujoorluni quianartussarsisarnerarpoq:

- Qimerluuerujuuginnarluni quianartussarsinartarpoq, assersuutigalugu Inatsisartoqarfiup silataaniittoq eqqumiitsuliaq takoqqaarakku quiatsaammerpunga aperalunga: Aamma sunaana? Sooruna arnaq pamiulik, pamiuminik angut nuluminut naqeqqagaa?  Jan Gintberg eqqarsarpasilluni oqarpoq.

Quiasaarinerli kalaallinut taamaallaat tungassanngitsoq erseqqissaatigaa:

- Tamaani qallunaat angutit 55-iniit 60-it missaanni ukioqarpasittunik, isikkup tungaatigut imminut soqutiginngilluinnarpasittunik arlalinnik takuvunga. Tamanna ilimagisimanngikkaluarpara. Qallunaat angutit utoqqaat malugisimaartut puallataarissut, sumilluunniit isikkortik soqutigerpasinngingaaramikku allanngilarluunniit 60-ikkunnili kingullermik uffarnikut, quiasaarisartoq quiatsaammeqqarpasilluni naggasiivoq.

Jan Gintberg katersortarfimmi unnugu arfineq pingasunut tamanut ammasumik quiasaarissaaq, iserneq 100 koruuneqassalluni.

Aallakaatitassiaa ukiaru oktobarip aallartinnerani KNR-imi aallakaatinneqarnissaa naatsorsuutaavoq.