Questimik misissuiartortussat Qeqertarsuarmut ullumi tikipput

juunip 29-at 2007 15:19

Angutit marluk Qeqertarsuarmut ullumi tikipput, umiarsuaq takornariut Quest Qeqertarsuup avatinnguani ippassaani ikkarlittoq misissoriartorlugu.

Angutip aappaa sillimmasiisarfimmeersuuvoq aappaalu Canadami imarsiornermut aqutsisoqarfimmeersuulluni.

Questimik misissueqatissaat, Danmarkimi imarsiornermut aqutsisoqarfimmeersoq aammalu umiarsuup nalunaarsorneqarfiani, Bahamassit qeqertaanni imarsiornermut aqutsisoqarfimmeersoq, nunatsinnut aqagu tikissapput, taakkulu Ilulissaniit Qeqertarsuarmut politiit angallataannut ilaallutik ataasinngorpat tikissasut, politimestereqarfimmeersoq, Bjørn Bay, ilisimatitsivoq.

Umiarsuaq Quest, siornagut Disko II-mik ateqarsimasoq, takornarianik angallassilluni Qeqertarsuup avatinnguani qipoqqarnik isiginnaariartitsilluni ikkarlippoq, nammineerlunilu ippassaq kaanngariaraluarnera iluatsissimanani.

Takornariat Questimut ikkarleqataasut maanna Danmarkimut utereerput, angallammut allamut ilaallutik Ilulissanukaatiteriarlutik Danmarkimut timmisartumik ippassaq utersimapput.