Quest suli kaannganngilaq

juunip 27-at 2007 15:27

Umiarsuaq Quest Qeqertarsuup avatinnguani ullaaq ikkarlittoq suli kaannganngilaq, ilaasuili takornariat 52-it takornariallu ilisimasortaat marluk Qeqertarsuarmukaanneqarput, umiarsuaq ueriartulermat.

Ikkarlinneq pivoq qipoqqarnik puiaartunik takornariarnermi. Umiarsuaq arriitsunnguamik ingerlasimavoq, naallu umiarsuup naalagaata nunatta imartaa ilisimalluaraluaraa umiarsuaq siumigut ikkarlimmut majorassimavoq. Qujanartumik ilaasunik uippallertoqaranilu ajoqusertoqarsimanngilaq.

Takornariat nunaliaanneqarput umiarsuarmullu uteqqissanngitsut takornariartitsisuat Albatros Travel ilisimatitsivoq.

- Albatrosip umiarsuarmik piginnittut ataatsimeeqatigereerlugit aalajangerpoq, umiarsuarmiut eqqissillutik misissuinissaat pillugu ilaasut umiarsuarmut uteqqissanngitsut, angalanertilli timmisartukkut angallatillu allat atorlugit nangissagaat aalajangerpugut, Albatros Travelip pisortaa Søren Rasmussen oqarpoq.

Umiarsuaq misissorneqareersuni aallaqqissaaq, angallassinissalu allat ikkarlinnermit akornuserneqassanersut suli ilisimaneqanngilaq.

Umiarsuup naalagaata ilisimatitsissutigisimavaa umiarsuaq putusimanngitsoq, ulikkiartorneranilu usit oqimaalutaralugit kaanngartinniarneqarumaartoq.

Umiarsuaq kinngunngimmat sillimaniarneq annikillisinneqartoq politiit ilisimatitsipput.

- Umiarsuarmik piginnittut umiartornermut aqutsisoqarfiup nalilissavaa umiarsuaq ingerlaqqissanersoq, umiarsuullu naalagaa ikkarlinneq pillugu kredsrettimut kingusinnerusukkut nassuiaasinneqassaaq, Bjørn Bay politimestereqarfimmeersoq oqarpoq.