Quebecip ministeriunera pilersaaruteqarpoq

Nunavimmi inuuniarnerup ilorraap tungaanut allanngortinnissaa siunertaralugu pilersaarutip, Plan Nordimik taaguuteqartup, piviusunngortinnissaa Quebecimi ministeriunerup sulissutigileruttorpaa, taamaattumik aningaasaliisussassiorluni nunani arlalinni maanna angalaaleruttorpoq.

Siunertaq taaguuteqarpoq Plan Nord, Issittoq pillugu pilersaarut.

Qaammatit marlussuit qaangiussimalerput, pilersaarut taanna nutaarluinnaq sukumiisorlu Quebecip ministeriunerata, Jean Charestip, saqqummiummagu.

Pilersaarummi avannaa Nunavillu eqqarsaatigineqarput. Nuna tamanna Frankrigip marloriaataatut annertutigaaq, 120.000-illu  missaannaanik  inuttussuseqarluni.Taamaakkaluartoq tamaani nunap pisuussutai, nunarsuatsinni nunanit allanit piumaneqaqisut annertuupiluussuullutik.

Pilersaarut Quebecimut Nunavimmullu pingaaruteqarluinnartuusoq ministeriunerup Jean Charestip oqaatigaa.  Tassalu tamannarpiaq pissutigalugu nunat allat aningaasaleeqataanissamut pilerilersinniarlugit massakkut angalavoq.

Jean Charest Tuluit Nunaanni, Belgiami aamma Tysklandimi sapaatip akunnerani uani angalavoq. Nunap pisuussutai soorlu aligoqqiit, urani, saviminissaq nikkelilu angalanermini oqaluttuarai. Tamakkulu piiarneqassappata Quebecip avannaani imeq atorlugu innaallagissiorfeqarnera aamma nittarsaallugu.

Jean Charest Kinamut Japanimullu qaammatip tulliata ingerlanerani angalaassaaq.

Quebecimi oqartussat Plan Nordip pilersinneqarnissaanut ukiuni tulliuttuni 25-ni 400 millionit koruuninik aningaasaliiniarlutik aalajangiussaqarput. Nunat tikeraarneqartut annertuunik aningaasaliinissaat ministeriunerup naatsorsuutigaa. Taamaattoqassappallu Nunavimmi Inuit 10.000-iusut  inuuniarnermikkut atugaannik allannguuteqartussaanissaa  Jean Charestip ilimagaa - tassami nunanit allanit suliartortut amerlagaatsiartussaassammata, taakkumi aqquserniorlutik, qimuttuitsunut aqqusiorlutik nunaqarfinnilu umiarsualiviliortussaassammata.

Pilersaarut piviusunngussappat Nunaviup Quebecillu avannaata allanngorujussuarnissa ilimagineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat