QSIP: Saniatigooralugu aalisartut aamma kapisilittassaqarlik
Malittarisassanili nutaanik saniatigooralugu aalisartut kapisilinniarsinnaajunnaarnissaannik siunnersut ilaassanngitsoq, taavalu aamma kapisillit nunatsinniittumik tukerarfeqarnersut misissorneqarnissaa ilaassasoq, Qaqortumi Sulernermik Inuussutissarsiuteqartut Peqatigiiffianit neriuutigaat.
Sulinermik inuussutissarsiuteqartut aamma kapisilinniarsinnaajuarnissaat pingaaruteqartoq, Qaqortumi Sulinermik Inuussutissarsiuteqartut Peqatigiiffianni, QSIP-mi, siulittaasup Jacob G-Motzfeldtip erseqqissarpaa:
- Isumaqaratta taamatut ukioq naallugu suleriarluta upernaakkut imaluunniit aasakkut ukiakkulluunniit pinialuttagarput unitsinneqassappat uagut inuussutissatsinnik ukiup sinneranut piniartarnerput taamatut killilersugaassappat soorunami akueriuminaakkami, Jacob G-Motzfeldt oqarpoq.
Aamma atuaruk Sunngiffimmi kapisilinniartarneq Aalisarnermut Naalakkersuisoqarfimmit inerteqqutigineqalissaaq
Kapilisilinniarneq pillugu nutaanik malittarisassaqalernissaa pisariaqalerpoq, atlantikup avannaani nunat kapisillit nungutaanissaannut illersorniarlugit suleqatigiiffiani NASCO-mi aqutsinissamut nutaamik isumaqatigiissusiortoqarmat, Nunatta peqataaffigisaanik. Isumaqatigiissut ukiuni pingasuni atuutissaaq, pitsaanerusumillu nakkutiginnermik kapisilittanillu pitsaanerusumik nalunaarutigineqartarnerannik malitseqassalluni. Aamma kapisilittassat 45 tonsiussapput.
Isumaqatigiissut taanna naapertorlugu Naalakkersuisut malittarisassatut nutaassatut siunnersuuteqaraluarput, taakkuali aalisarnermut naalakkersuisumit tunuartinneqarput. Saniatigooralugu aalisartut pisassineqassanngitsut siunnersuummi tassani ilaagaluarpoq.
Pisassiissutinik millilerisoqassatillugu, saniatigooralugu aalisartut pisassaannik siulliullugit ilaanngaanneqartassanngitsut, QSIP-mit maanna kaammattuutigineqarpoq.
- Arlaannik uparuaasoqaraangat soorlu sulisartoq imaluunniit saniatigooralugu pinialuttartoq taakku siullerpaallutik eqqorneqartarneri taanna taamaattussaannartut isigiunnaarneqarnissaa siunertaralugu uparuarparput, Jacob G-Motzfeldt oqarpoq.
Aamma kapisilinniartarnerup nakkutigineqarlualernissaa, assersuutigalugu pisat amerlassusaanik nalunaarsuiffeqalernissaa Jacob G-Motzfeldtip siunnersuutigaa.
Aamma atuaruk Kommuneqarfik Sermersooq: Tusarniaaneq pitsaanerusinnaagaluarpoq
Kapisillit nunatta imartaaniittartut Nunatta imaluunniit Canadap kapisiligineraat, nunatsinnilu suffisarnersut ilisimatuunit misissorneqarnissaat Jacob G-Motzfeldtip kaammattuutigaa.
- Nunatta nunat allalluunniit kapisiligineraat iluamik misissorneqartartuuppata mattussiinnarnermiit iluarnerussagaluarpoq, Jacob G-Motzfeldt KNR-imut oqarpoq.
