QPK: Qimarnguinni atuisut siorna 642-usut amerlavallaaqaat
Ukioq manna qulequtaavoq: Nakuuserneq persuttaanerlu nipangiutiinnarnagu oqallisigitigu.
Killiliisinnaaneq pillugu Qimarnguiit ima oqarusupput: Illit inuunerit tassa illit akisussaaffiit. Illit nammineq qinissavat nakkarsaaneq, siorasaarineq persuttaaneq, ersittoq ersinngitsorlu inuninni ilaatinniarnagu, Qimarnguinniit taama oqallissaaripput.
Qimarnguinni sinerisamiittuni arfineq marluusuni atuisimasut siorna 642-upput.
Qimarnguiit ukiut tamaasa nalunaasuisarnerat tunngavigalugu kisitsisit
ikiliartoraluartut suli amerlavallaarujussuaqaat, Regine Enoksen
Qimarnguiit Peqatigiiffisa Kattuffiani siulitaasoq oqarpoq.
Nunatsinni inuiaqatigiit akornanni nakuuserneq timikkut tarnikkullu peqqissuunissamut ajornartorsiutaasorujussuuvoq.
Tamaammat angutit arnat meeqqallu assigiimmik ikiorserneqarlutillu sullineqarnissaat pisariaqarluinnartoq oqaatigaa.
- Tamannalu inunnik sullisisuusut nukittuffigisariaqarparput. Timikkut tarnikullu anersaaneq akuerineqarsinnaanngilaq akuerineqanngisaannassallunilu. Pingaartumik meeqqat annersaaviusumi peroriartortut eqqarsaatigalugit pinaveersaartitaaqarpoq, Regine Enoksen oqarpoq, nangillunilu.
- Meeqqat angerlarsimaffimmi annersaaviusumi peroriartorsimasut annertuumik kingunerlutsitsisarput innarlerneqatarlutillu. Tamatumami kingunerisinnaasasa ilagisarpaat oqaatsit atorlugit inoqatsiminnut annersaaneq pissusissaannartut isigalugu meeqqat inuusuttullu atulertarmassuk.
Iliuuseqanngikkaanni inunnik allanik ataqqininneq nalilittullu isigininneq ilikkarneqarneq ajortoq oqaatigaa, taamaattumillu oqaloqatigiissinaaneq ilinniartariaqarsoralugu.
- Inuit oqaloqatigiissinnaasut akornanni nakuuserneq pisariaqanngilaq. Ajornartorsiutit oqaloqatigiinnikkut qaangerneqarsinaasarmata, Regine Enoksen, Qimarnguiit Peqatigiiffisa Kattuffiani siulittaasoq, Sisimiuni Oqqiffik-mit taama nalunaaruteqarpoq.
Qimarnguiit allat ukunaniipput: Qimarnguik, Nuuk; Sikkersoq, Qaqortoq: Qarajaq, Aasiaat; Naneruaq, Ilulissat; Saaffiginnittarfik, Paamiut aamma Ornitaq, Narsaq.
