Qorsussuarmi ulloq kingulleq
Nuannaartoqarpoq, atuartut soraarummeereerlutik aasaanerani atuanngiffeqarnertik aalllartimmassuk. Aliasuttoqarpoq, atuarfik ukioq 1953-imiillu atuartitsiviusarsimalluni matummat. Aviisi Sermitsiaq nittartakkamini taamatut allaaserisaqarpoq.
Ilinniartitsisut atuartullu Qorsuussuup iluani silataanilu sisamanngormat saliipput. 10. klassemi atuartut soraarummeernermi allagartatik Qassimi tiguaat.
Atuartut ilinniartitsisullu atuartitsivinni katerisimaarput, taakkua saniatigut ilisimaneqarluartut Hinnarik Frederillu anitsiartarfimmi aliikkusersuillutik.
Aliikkersuineq erinarsuummik ilisimaneqarluartumik "Qorsussuaq Baaj"-imik naggaserneqarpoq.
Erinarsoqatigiittoqarnerani atuartut, ilinniartitsisut angajoqqaallu killitsillutik qullilipput. Aviisip sermitsiap nittartagaani taamatut allaaserinnittoqarpoq.
Atuarfik aserfallassimavallaalermat, atuartitsivigissallugulu ullutsinnut naleqqukkunaartoq Kommuneqarfik Sermersuumi kommunalbestyrelsep tunngavilersuutigaa. Nuummi meeqqat atuarfiini atuartut ukiut kingulliit qulit ingerlaneranni ikileriapiloorsimanerat tunngavilersuummut ilanngullugu oqaatigineqarpoq. Taamaattumillu Nuummi meeqqat atuarfiisa arfiniliunissaannut tunngavissaqarani.
Aasanerani atuanngiffeqarneq qaanngiuppat, Qorsussuarmi atuartut ilinniartitsisulllu Nuummi atuarfinnut allanut nuutinneqassapput, tassalu Atuarfik Samuel Kleischmidtimut Atuarfik Ukaliusamut, Nuussup atuarfianut, Kangillinnguit atuarfiannut kiisalu Qinngorpumi atuarfimmut nutaarluinnarmut Atuarfik Hans Lyngemut, aviisi sermitsiaq nittartakkamini taamatut allaaserisaqarpoq.