Qorsussuaq matussaaq
Atorunnaarsinneqarnissaanut tunngavilersuutigineqartut ilagaat Qorsussuaq illoqarfiup atuarfiini pisoqaanersaammat. Tassami 1953-imi sanaajuvoq, aserfallassimaqaluni ullutsinnilu atuartitsinermut naleqqukkunnaarsimalluni.
- Kiisalu Nuummi atuartut ukiut qulit ingerlaneranni ikileriarujussuarsimapput, taamaattumillu Nuummi meeqqat atuarfii arfinillit tamarmik ingerlanneqaannarsinnaanatik, kommuneqarfik Sermersuumi kommunalbestyrelsi matusinissamut ilaatigut taama tunngavilersuuteqarpoq.
Qorsussuarli matuvinneqassanngilaq. Pilersaarutigineqarpormi Qorsussuup illutaata suliarineqarnissaa, ilinniartitsinernullu allanut atorneqarnissaa.
Qinngutsinni Atuarfik Hans Lyngemik sanaartorneq pilersaarutit malillugit ingerlavoq, ukiullu atuarfiusup tulliani 2011-mi aggustimi atuartunut 1.-7 klassinut atulernissaminut piariissaaq.
Atuarfik Hans Lyngemi katillugit 30-nik ilinniartitsisoqassaaq 300-nillu atuartoqarluni.
