Qorlortorsuarmi qaartitsinngitsoorput

Qorlortorsuarmi erngup nukinganik nukissiorfissami erngup sullussaanut qaartitsinissaq ippassaq ingerlanneqartussaagaluartoq ingerlanneqanngitsoorpoq, pisortatigoortumik peqataasussaagaluit silap ajornera pissutigalugu ippassaq apuutinngitsoormata.

Inuussutissarsiornermut pisortaqarfimmeersut naalakkersuisunut ilaasortaq Johan Lund Olsen siuttoralugu peqataasussaagaluarput, Kujataanilu kommunini pingasuni borgmesterit atorfilitatik ilagalugit aamma peqataasussaagaluarlutik.

Qorlortorsuarmi nukissiorfissaq 2008-miit Narsamut Qaqortumullu innaallagissamik pilersuilissangatinneqartoq katillugit 220 millioni koruuninik aningaasaliiffigineqarpoq. Nukissiorfiit Namminersornerullutik Oqartussanit siorna 110 milliuuni koruuninik aningaasaliiffigineqarput, taakualu aningaasat amerlaqataat Nukissiorfinniit piareersimasuutigineqarlutik.

Erngup kuunneranik allanngortitsisussaq ippassaq pisortatigoortumik qaartinneqartussaagaluarpoq, sapusiornissarlu aappaagu upernaakut ingerlanneqartussaavoq.