Qorlortorsuarmi nukissiorfissaq naammassilerpoq
Qorlortorsuarmi erngup nukinganik nukissiorfissaq naammassigaluttuarpoq. Sanaartorneq 230 millioni koruunit missaannik akeqartussaq, ukiup 2004-p naalernerani aallartinneqarpoq.
Nukissiorfissap Qaqortoq Narsarlu innaallagissamik upernaaq manna aallartittumik tunioralertussaagaluarpai.
- Kisianni silarluttarnera ilaatigut pissutigalugu, Narsami Nuugaarsummiit kangerluk ikaarlugu silaannakkut aqqusiinissaq kinguarsarneqarsimavoq. Naatsorsuutigaarput immaqa septembarimi naammassiumaarluta, Qaqortumi Nukissiorfiup pisortaa, Søren Pedersen, nassuiaavoq.
Turbin-it marluk, innaallagissiortullu maskiinaat marluk, nukissiorfissamut ikkunneqareerput. Naammassineqanngitsut tassaapput, kangerluit pingasut kuullu qulaallugit ledninnginik atassusiinissat. Taakkunannga takinerpaaq 3 ½ kilometer-nik takissuseqarpoq.
