Qoornoq: Ukiormanna borgmesterissarsiortoqassanngilaq
Nuummi angalasartunut ukiuni kingullerni ileqquusarpoq nunaqarfimmi inuerussimasumi borgmesterimik qinersisoqartillugu juulip qaammataata arfininngornerani siullermi peqataajartussallutik.
- Imeqarfimmit nunaqarfimmut roorujut ajortissimasut ukioq manna suliarissallugit pingaartinneruarput, Qoornup borgmesteria Ivik Jensen oqarpoq.
Iviullu erseqqissarpaa peqatigiiffimmi ilaasortat ukioq kaajallallugu suliniuteqartartut qulit missaannaanniittut.
- Ajoraluartumik borgmesterimik qinerisarneq tassaalersimavoq nuannaartarfissuaq, ilaqutariinnut nuannisaarfiusussaagalurtoq, Ivik Jensen erseqqissaavoq.
Qoorngup ikinngutai 1987-mi pilersinneqartoq, nunaqarfiusimasumi assigiingitsorpassuarnik isumagisaqarpoq, soorlu oqaluffiup katersugaasiviullu asserfallatsaliorneqarnerinut isumagisaqartartoq imermillu pilersuineq aamma pissusissamisuussasoq.
- Peqatigiiffiup pingaartitaraa ileqquttoqqanik attatitsiinnassalluni, soorlu nunaqarfiusimasoq kikkunilluunnit aamma tikinneqarsinnaasariaqartoq.
Peqatigiiffiup siulittaasuata naatsorsuutiginngilaa amerlasoorpassuarnik ukioq manna tikeraarneqassallutik.
- Ilimagereerpara borgmesterimik qinersisoqartussaanngimmat amerlasoorpassuarnik tikeraartoqassalluta, Ivik Jensen erseqqissaavoq.
Iviup neriuutigaa ilaasortanngorniartoqarumaartoq peqatigiiffiup siulersuisuinut saaffiginnillutik, ilaasortanngortussat peqatigiiffiup suliniutaanut kivitseqataalluarsinnaassallutik.
- Amerlasoorpassuit isumaqannguatsiartarput ukiumut ataasiaannarluta suliniuteqartartugut, taamaaqqajanngilarli, Ivik Jensen erseqqissaavoq.