Qivittoq aliannaartitsivoq
Filmip ippassaq takutinneqarnerata nalaani illariallattaarnerit, pisunut oqaasertaliinerit nilliallattarnerillu tusarsaapput. Malunnarpoq inuit ilaasa filmimmik takunneqqinnertik nuannaralugu isiginnaaraat, tassami taakku meeraallutilli 1950-ikkuni kingullermik takugamikku aatsaat takoqqippaat, immaqa ilaasa ilisarisimasatik takullugit nuannaajallattarput. Filmeriat ilagaat Amanda Fencker, taassuma filmi meeraalluni kingullermik takuaa:
- Takoqqillugu nuanneqaaq. Assigiinngitsullu oqaluttuarineqartarnikut takoqqillugit nuannerpoq. Aataga filmiliortunut ikuunnikuuvoq aamma instruktørritut ikiortaalluni, Amanda Fencker oqarpoq.
Qivittoq 1956-mi filmiliarineqarpoq Ilulissani Saqqamilu. Pingaarnertut inuttaapput Poul Reichhardt, Astrid Villaume aamma Niels Platou. Danskit filmiliaanni siullersaalluni Oscarinnattussatut innersuunneqarpoq.
Filmeriat ilagaat Jens Davidsen:
- Assut takoqqillugu attortinnarpoq. Ilaannaminiinnanngui eqqaamagakkit, ullumi puigorsimasakka imaallaat takoqqippakka. Taamanikkut inooriaaseq qanoq minguitsigisoq takuvara, soorlu pujortuleeqqat pujorneri, iluliarsuit qaqqoreqqissaat akornanni, illoqarfiup iluani nunaqarfiullu iluani pappiaqqat teqqalasut maanaannaq, oqarpoq nangillunilu.
- Taavalu ukua qallunaat kalaallillu immikkuullarissusaat assigiinngissusaalllu uani filmimi takutinneqarpoq, Jens Davidsen naggasiivoq.
Filmip DVD-nngortinnera aamma paggataasaannavillugu nungunneqartarpoq, maannamullu arlaleriarlugu naqiteqqinneqartarsimalluni.
Filmip Kalaallit Nunaanni qassinik takuniarneqarsimanera Nordisk Filmip suli ilisimanngilaa, taamaattorli nuannarineqaqisoq oqaatigalugu. 13.000-nngorlugu naqiterneqalereersimalerpoq, tamarmillu nungoreerput.
Immaqa inuit ilaasa malugisimassajunnarsivaat, filmimut pilerisaarummi assiliarsuarmi allassimammat QIVITOQ. Nordisk Filmip nassuiarpaa, Qivittoq filmiliarineqaqqaarmat allattaasitoqaq atorlugu allataammat taanna maliinnarlugu allattaasitaaq malillugu allanngortinneqarsimalluni, taamaattorli, qanga K´ pinnagu Q atorneqarsimalluni aammalu "t" ilanngunneqarsimanani
