Qitsuk eqqartuussivimmi aalajangeeqataassaaq
Bostonimi marsip ulluisa 23-anni eqqartuussisoqalerpat qitsuk eqqartuussivimmi aalajangeeqataasussatut aggersarneqarpoq, naak piginnittaa oqaraluartoq "oqalussinnaananilu tuluttut paasisinnaanngitsoq".
januaarip 18-at 2011 09:53
Aviisimi The Telegraphimi allaaserineqartut malillugit qitsummik piginnittup, Anna Esposito-p, kukkusoqarsimanerarpaa, eqqartuussivimmiilli akineqarpoq, qitsuk Tabby Sal eqqartuussivimmut pinngitsoorani takkutissasoq.
Uumasut nakorsaanniit nalunaarut Anna Espositop eqqartuussivimmut allakkamini ilanngukkaluarpaa, tassalu Tabby Sal tassaasoq qitsuk angutiviaq naatsunik meqqulik, aamma issuertinnikoq.
Tabby Sal-ip aggersarneqarneranut peqqutaagunarpoq, kingullermik inunnik kisitsisoqarmat, qitsuk ilanngullugu Anna Esposito-p allassimammagu - soorunalimi "uumasutit" allaffissaata nalaani.
Amerikamili eqqartuussiveqarfiit nittartagaanni allassimavoq, "eqqartuussivimmi aalajangeeqataasussat tuluttut oqalloreqqissaarnissaat pisariaqanngitsoq".
