Qitornarsianut quppersakkat siulliit saqqummerput
Ilaqutariinnut paarsisartunut sullissinerup 2010-mi annertusaavigineqarneranut atatillugu paasisitsiniaanermik atungassianik Isumaginninnermut Naalakkersuisoqarfik suliaqarluni aallartitsivoq.
Quppersakkallu siulliit marluk qammammi uani saqqummersinneqartussanngorput.
Quppersakkat taaguuteqarput: Sissel Stærimik oqaluttuaq aamma Angajoqqaarsiani najugaqaruit - una ilinnut tunngavoq, quppersakkullu tamarmik kommuninut nassiussuunneqassapput qitornarsiarineqartunullu agguaanneqassallutik.
Sissel Stærimik oqaluttuaq qitornarsianut ukioqanngitsunit arfinilinnut ukiulinnut naleqqussagaavoq.
Sissel Stærip arnaa napparsimamat Sissel angajoqqaarsiartaarpoq.
Quppersagaaqqamilu anaanamit avissaarneq qitiutinneqarpoq, ilaatigullu Sisselip ilaqutarsiartaaminut naleqqussarsimanera aamma ”qatanngutitaaminut” attaveqarnera pillugit atuarneqarsinnaalluni.
Quppersagaq Angajoqqaarsiani najugaqaruit - una ilinnut tunngavoq qitornarsianut arfinilinniit aqqaneq marlunnut ukiulinnut naatsorsuussaavoq. Quppersagaq meeqqanut angajullernut atuaruminarsarlugu ilusilersorneqarsimavoq.
Angajoqqaarsiat suuppat? Kommunimi isumaginninnikkut sullissisoq sulerisuua? Qaqugu angajoqqaannut uteqqissinnaavunga?, tassa angerlarsimaffiup avataanut inissinneqarnermi apeqquterpassuit saqqummersartut quppersakkami akissutissarsineqarsinnaasut.
Isumaginninnermut Naalakkersuisoqarfiup quppersakkat tallimat 2010-mi saqqummersinniarpai.
