Qitik kinguaattoorpoq
Kulturikkut illorsuup Katuap pilersaarutit allanngortittariaqarpai.
Qittasinik kamippalersortussaagaluit kamippalersornissartik sisamanngornermut, aggustip ulluisa 23-annut, kinguartitsittariaqaraat, Katuami aaqqissuussinernut pisortaq, Susanne Andreasen, ullaaq-manna nalunaarpoq.
- Tupinnaannartumik amerlasuut peqataarusullutik nalunaarsimapput, allaat holdinik arlalinnik utaqqisuniittoqarluni, taamaammat allanngortitsisariaqarnerput inuppassuarnik eqquissaaq, taanna oqarpoq.
Holdili Uaajeertussat pilersaarutit malillugit pissaaq. Holdillu aqagu takutitsisussat allannguinernit eqqorneqassanngillat.
Peqataasussat arlaat nalornisaqassagaluarunik Katuamut saaffiginninnissamut tikilluaqqusaapput.
Norgemiut qitittartut, Bårdar Danseakademimeersut, nunatsinneersoq Alexander Montgomery Andersen siuttoralugu, Uummannami putserunnaarpat tikinnissaannut qittatussat tassa naammagittartariaqarput.