Qiteriaaseq eriagisassanngortinneqarpoq
Kulturikkut eriagisassat tigussaasuungitsut toqqortaatinut ilanngutitinnissaat pingaartuuvoq, taamaattumik UNESCO-p nalunaarutigimmagu qiteriaaseq flamenco ilanngunneqarsimasoq spaniamiut aallartitaat nuannallutik imminnut eqitaarput.
UNESCO-p Kenyami ataatsimiititsinerani kulturikkut takutitseriaatsit 46-t toqqortaatinut ilanngunneqarput. Meqqutit atorlugit katsorsaariaatsip aamma franskit igariaasiata saniatigut ilaatigut ilanngunneqarput Iranimiut uuliamik taneriarlutik paasarnerat, Koreamiut qisunni ilusilersueriaasiat aamma Litauenimi erinarsuutit arlalinnik erinallit ilanngunneqarput.
Ataatsimiineq Afrikami ingerlanneqaraluartoq Afrikamiut kulturiat toqqarneqartunut ilaanngilaq. Tamanna UNESCO-p aallartitaasa Afrikami nunanut uparuaatigaa, taamaattorli afrikamiut qaaqquneqarput nunat allat kulturiannik aallusseqqullugit. Assersuutigalugu Spaniap Kenyami aallartitaa isumaqarpoq flamencomik qitinneq Afrikami iluatsilluarsinnaasoq, tassami flamenco afrikamiut rytmiannut nipilersornermullu anersaavannut assigummat.
