Qipoqqarpassuaqarnera Maniitsumi aalisartunut akornusersuisoq

Saarullinniarluni bundgarnersorneq arnarlunniarnerlu aallarteruttorpoq, taamaalillutik aalisartut ukiorsuaq isertitaqarsimanngeriarlutik aningaasarsioqqilerlutik. Qipoqqaalli ammassat pueqqaneranni sissamiittut assut akornusersuipput, Maniitsumi aalisartut bundgarninik arfinilinnik annaasaqartut taama oqarput.

Pisat ullormut 20.000 koruunit missaannik nalillit annaaneqartarput. Bundgarnillu ataatsit 48.000 koruuninik naleqarput.

Aalisartoq Hans Heilmann oqarpoq, maajip ulluisa qulingani saarullinnialeramilli maannamut bundgarnit marluk annaareeritik:

- Aallaqqaammut ajunngikkaluarpoq, puisit arferillu takkunnerisa kingorna ajorsigami, bundgarnigut ajutooqattaaleramik. Qipoqqaat pulasimariarlutik bundgarnit sissortarsimagamikkit, ammassaat talinneranni sissarparamik uumasut, nassuiaavoq.

Aperaarput qanoq aseruitigisimanersut.

- Annertungaatsiartumik bundgarnitta arlaat aserorsimagamikkit. Suliassarujussuupput immaqa sapaatip-akunneri marluk missaanni suliassaapput.

Aalisartut maannamut qanormita annaasaqarpat?

- Bundgarnit ataatsit ullormut 3 tonsit sinnilaarlugit pisaat agguaqatigiissillugu kiilumut 7 koruunit missaannik akilerlugit tunigaanni, 21.000 koruuninik isertitsissutaasinnaasarput. Taakku annaavagut, Hans Heilmann oqarpoq.

Aalisartut maanna bundgarninik allanik nivingatitaqarput, bundgarnilli aserukkat arlaasa taarsernissaat nalilersortikkamikkit paasitinneqarput bundgarnit 9 favn-it 48.300 koruuneqartut.

Aalisartoq Hans Heilmann isumaqarpoq Namminersornerullutik Oqartussat qassutaarsiutinut tapiisariaqaraluartut.

Maniitsumi aalisarnermut piniarnermullu nakkutilliisoq Jakob Heilmann bundgarninik aserorsimasunik alakkaaqqammersoq oqarpoq, bundgarniinnaanngitsut aammali arnarlunniutit Maniitsup eqqaani qipoqqarnit ulluni makkunani aseruatiterneqartut:

- Massakkut tikillugu bundgarnit arfinillit qipoqqarninngaanniit aserorterneqarsimagamik. Bundgarniinnaanngillat aamma arnarlunnut qassutit nalunngisakka arfineq-marluk.

Qipoqqaqarnermik, taavalu qipoqqaat ulluni makkunani sissamiileruttorlutik ammassaat sissamiinnerisa nalaani, sissami neriniartaramik.

Ulorianartorsiortoqarpa?

- Taamatut oqaatigisariaqarpara. Piniutaannaanngillat – assersuutigalugu nalunngisaqarpunga amoornerup nalaani bundgarninut naatittoqarsimagaluarpat taava umiatsiaaraq amoorutaasoq tapulluni kivisinnaagaluarpoq. Piniutinut aamma inunnut ulorianartorsiortitsinikuugamik amerlinikuunermik, ulorianaateqarsinnaapput taamaalillutik, Jakob Heilmann ukiuni qulini Maniitsumi aalisarnermik piniarnermillu nakkutilliisoq oqarpoq.

- Pissutsit allanngoriartorput, aatsaat taama bundgarninik aserorteritigisoqarpoq, kangerlummi ataasiinnarmi arfinillit taamatut aserorneqaramik.

Aalisarnermut Piniarnermullu nakkutilliisoq Jakob Heilmann aamma oqarpoq, pisut tamaasa Aalisarnermut Piniarnermullu Pisortaqarfimmut nalunaarusiarisimallugit.

Aalisartup Hans Heilmannip ilimagaa qipoqqaat ammassat pueqqaneranni, qularnanngitsumik juunip qeqqata tungaanut, akornutaajuarallassasut.