Takornariat umiarsuaat Disko II Qeqertarsuup ungasinngigisaani ullaaq ikkarlippoq.
Qipoqqarnik isiginnaartoqarnerup nalaani Disko II ikkarlittoq, Albatros Travelip pisortaata Søren Rasmussenip oqaaatigaa:
- Qeqertarsuarmut tikikkiartulernermi qipoqqaat malinnaavigineqarsimapput, taamaammallu umiarsuaq kigaatsuinnarmik ingerlaarsimalluni. Ikkarlittoqarmat umiarsuaq soorunami sajorujussuarsimavoq. Ilaasut katersorneqarput, ajoqusertoqarsimanngitsorlu paasinarsilluni, Søren Rasmussen oqarpoq, nangillunilu:
- Umiarsuup ilua tamarmi kaptajnimit misissorneqarpoq, imarmillu isaasoqanngitsoq paasineqarluni, tinikkiartormalli umiarsuaq ueriartorpoq ilaasullu nunamukaanneqartariaqarlutik, Søren Rasmussen nassuiaavoq.
Ilaasut Qeqertarsuarmut takornariartinneqartussaammata pilersaarutit malillugit takornariartinneqarput.
Taakku nunamiinneranni umiarsuup timitaa aqqartartunit misissorneqassaaq, misissugassallu allat isumagineqareerpata umiarsuaq ingerlaaqqissinnaassanersoq kaptajnip aalajangerumaarpaa.
Umiarsuaq ingerlariaqqissinnaassanngippat ilaasut allamut ilaaffissarsiuunneqassapput.
Disko II – Quest-imik ullumi ateqartoq - Albatros Travelimit aasaq tamaat attartorneqarpoq.
