Qipoqqarniaqqittalerneq nunarsuarmioqatitta isumakulunnartippaat
Taama allappoq Siku News.
- Qipoqqaat piniagaaqqittalerneri uumasunut taakkununnga kisimi ajortumik kinguneqassanngilaq, aamma Kalaallit Nunaanni arfernik takornariartitsisarnerup ajoqutigilissavaa. Takornariat ikilissapput aamma nunap aningaasanik isaatitsinera appariassaaq, Naalakkersuisunut suliassassanngortitsinermi ilaatigut taama allassimasoqarpoq.
Nunarsuatsinni arfernik takornariartitsisartut annilaangassutigisaasa ilagaat, takornariat Kalaallit Nunaat tunussagaat, taamaalilluni Kalaallit Nunaata takornariaqarneranut ajoqutaassalluni.
- Qipoqqaat uumasut Kalaallit Nunaata iluaqutiginerussavai, neqaasa tunisaaneranut naleqqiullugit. Qipoqqaat uumasut iluaqutigaat aningaasarsiutaagamik, suliffissaqartitsigamik aammalu kusanassusermik takutitsigamik, allakkami aamma taama allassimasoqarpoq.
Nunarsuaq tamaat ataatsimut isigalugu, arfernik takornariartitsisarnermi ukiumut aningaasat 3 miiliard koruunit isertinneqartarput, qipoqqaallu takornarianit nuannarineqarnerpaallutik.
1980-ikkuni qipoqqaat piniagaajunnaarput, aatsaallu aasaq manna piniagaaqqilerlutik. Nunatsinni ukiumut qipoqqaat qulingiluat pisarineqarsinnaapput.
