Qipoqqaq kapisilinnut qassutinut napittoq
Qipoqqaq 12-13 meterit missaannik takissusilik ullut pingasut matuma siorna kapisilinnut qassutinut napippoq. Pinngortitalerifik, Qaasuitsup Kommunia aamma Namminersorlutik Oqartussat ilisimatinneqareerput. Ippassarlu aalajangiunneqarpoq allatut ajornartumik toqunneqartariaqartoq.
- Maanna tininnissaa utaqqiinnarparput qipoqqaq pilanniarlugu, aalisartoq piniartorlu Jaakunnguaq Olsen Akunnaamiik KNR-mut oqarpoq.
- Qipoqqaq qassutinut uiuleriinnut qulit missaannut napissimavoq nunaqarfiup inuerunnerup Nivaap eqqaani. Aamma ilimanarpoq qassutit atoqqitassaajunnaarsimassasut, Jaakunnguaq Olsen oqarpoq.
Qaasuitsup Kommuniani aalisarnermut piniarnermullu immikkoortumi pisortaagallartoq Pâviâraq Jakobsen nakkutilliisutut najuuppoq. Taanna aamma Pinngortitaleriffimmit ilitsersuutinik pissarsereerpoq ilisimatuussutsikkut misissugassanik katersinissamut.
- Neqi utoqqarnut pisortallu suliffeqarfiutaannut Akunnaami agguaanneqassaaq. Qassutinik piginnittoq annaasaminut taarsiissutitut neqimik pissarsissaaq. Taamatuttaaq umiatsiaaqqat 13-it qipoqqarmik Akunnaamut kaleqataasut neqimik pissarsiumaarput, Pâviâraq Jakobsen KNR-mut oqarpoq.
Taanna aamma oqarpoq allatut ajornartumik qipoqqaq toqunneqartariaqalersimasoq.
- Qassutinut nermussimagami. Talerui tamarmik timaanut attuullutik sukarunneqarsimapput taamalu sarpini kisiat atorlugu aalasinnaalluni. Ulluni marlunni napissimareerluni arfeq aamma qasulluinnarsimavoq, Pâviâraq Jakobsen oqarpoq.
