Qipoqqaat neqaannik immaqa pisisoqarsinnaalissaaq
Kattuffiit arlallit qipoqqaat nungukkiartorunnaartutut nalilerpaat. Qipoqqartassinneqarnissamut Kalaallit Nunaat qinnuteqaateqaleruni tamanna tunngavilersuutigineqarluarsinnaasoq, Aalisarnermut Piniarnermullu Naalakkersuisoqarfimmi pisortap Amalie Jessenip oqaatigaa:
- Pitsaanerulertutut isikkoqarpoq, erseqqarinnerusumik. Taamaallaat apeqqusiinnarpara misigissutsit aallaavigalugit aalajangiiniartarnerit. Ukioq manna tamanna atuukkami, aarlerinarsinnaavorlu aappaagu aamma atuuteqqissasoq, Amalie Jessen oqarpoq, nangipporlu:
- Kisianni tassa IWC-p IUCN-illu uppernassusaat apeqquserneqassapput, pingaartumik IWC-p ilisimatuussutsikkut ataatsimiititaliaata tamanna akuerereeraa. Tassa qipoqqaat nungukkiartorunnaartutut nalilerneqarnerat IWC-p akuerereerpaa, Amalie Jessen oqarpoq.
Arfanniarneq pillugu ataatsimiititaliarsuarmi, IWC-mi, kingullermik isumaqatigiinniartoqarmat Kalaallit Nunaat arfivinnik marlunnik pisassinneqarpoq, taakkuli ukioq manna pisarineqanngimmata aappaagumut pisassiissutinut ilanngunneqarput, arfiviit sisamat pisarineqarsinnaalissallutik.