Qipoqqaat bundgarninut napitittartut pillugit apeqquteqaateqarpoq

Allattoq Mads Lynge
juulip 03-at 2007 06:53

Aalisartut maannamut qipoqqaat peqqutigalugit bundgarniminnik qanoq atsigisumik taarsiiffigineqarsimappat?

Siumut sinnerlugu inatsisartuni ilaasortaq Ruth Heilmann naalakkersuisunut taama apeqquteqaateqarpoq, aalisarnermullu piniarnermullu naalakkersuisoq Finn Heilmann akivoq aalisartut pisortaqarfinnit nalinginnaasumik taarsiiffigineqarsinnaanissaminnut periarfissaqanngitsut.

Tassa taarsiivigitissinnaannissamik inatsisitigut tunngavissaqanngitsoq Finn Karlsen allappoq.

Pisuni ataasiakkaani aallarteqqinnissamut tapiiffigineqartarnermik aaqqissuussineq periarfissaasoq Finn Karslen akissummi allappoq, qinnuteqartulli piumasaqaatinik naammassinninnissaat piumasaqaataavoq.

Qipoqqaat aalisarnermi atortunut napitissimasut 1998-ip kingorna agguaqatigiissillugu ukiumut marluk pisarineqartarput, nalinginnaasumik toqoreersimasarput imaluunniit toqunneqarnissaat akuersissutigineqartarluni arferit naalliunnginniassammata.

Taamatut pisarisoorneqartartut saniatigut Aalisarnermut Piniarnermut Nunalerinermullu Pisortaqarfik piniarnermi atortut aserorneqarsimanerinik tammarsimanerinilluunniit arlalinnik nalunaarutisisarpoq, qipoqqaat amerlanertigut aseruisimasutut pasineqartarlutik.

Ajornartorsiutip aaqqiivigineqarnissaa pisortaqarfiup suliniutigigaa Finn Karlsenip oqaatigaa, nunallu allat attavigineqarsimasut aamma oqaatigalugu.

Aaqqiissutissalli – soorlu aalisarnermut atortut nipimik sumiiffimmi, arfernik, puisinik aalisakkallu ilaannik qimaatsitsisinnaasunik aallakaatitsissuserneri aningaasarpassuarnik naleqartarput.