Qipoqqaat akornusersorneqassanngillat
Jon Kroghip Touring Greenlandimeersoq takornarianik sapaatit akunnerata siuliani arfersiortitsilluni, inuusuttut 200 hiistilimmik sukkalisaarlutik qipoqqaq meterinik tallimanik ungasitsileramikku aatsaat unipput.
- Takornarianut tamanna nuanninngilaq. Aamma arferit puullaaqilernerinik aqqapallattarnerinillu kinguneqartarpoq. Eqqissiivilluta ingerlaaraangatta, arferup saniani sivisuumik uninngasinnaasarpugut meterinillu 300-nik ingerlaarujoortoq malittaralutigu. Kingullermilli arfersiortitsigatta, umiatsiap sukkasuuliap qanillattoqattaarpaa, arferlu allamut saariasaarpoq kingornalu ungasissupilussuarmi - immaqa meterinik 500- nik 800-nilluunniit ungasitsigisumi pueqqilluni, Jon Krogh ugeaviisimut oqarpoq.
Arferit qajassuukkumallugit malittarisassaqarpoq, Pinngortitaleriffimmi biologi Tenna Boye oqarpoq. Nuup Kangerluani qipoqqaat pillugit misissuilluni allaaserisaqarsimavoq. Qanillivallaaraanni imaluunniit sukkalisaarluni ornikkaanni, qipoqqaat nerisassarsiornerat akornusersorneqarsinnaavoq.
- Qipoqqaat Kalaallit Nunaannit Caribiamut nuliariatortarput piaqqillutillu, Caribiamiinnerminni nererpiarneq ajorput, ilaatigullumi nerinngivissortarlutik. Kalaallit Nunaat neriniarfiginiaannarlugu puallarserfiginiaannarlugulu ornittarpaat, kingornalu Caribiamut uteqqittarlutik. Taamaammat maaniinnerminni nerilluartarnissaat pingaaruteqartupilussuuvoq.
Arferit akornusersorneqartarnerat nunarsuaq tamakkerlugu ajornartorsiutasvoq, Tenna Boye oqarpoq. Taamaammat aamma malittarisassarpassuarnik aalajangersaasoqarsimavoq. Tenna Boyellu qipoqqaat pillugit allaaserisaa saqqummersinneqarmat, Nunatsinni 2011-mi malitarisassiortoqarpoq.
