Qinnuteqartut kingusissukkut akissutisissapput
Ilinniagaqarumalluni qinnuteqarfissaq februaarip aallaqqaataannut killeqarpoq.
Taamaattoq ukioq manna ilinniagaqalerumallutik qinnuteqarsimasut qanoq amerlatigerpiarnersut suli paasineqanngilaq, taamaattumillu
ilinniagaqarumallutik qinnuteqarsimasut akueritissimanerlutik itigartitaasimanerlutilluunniit suli tusarlerneqasinnaanngikkallarput.
-Isumaqarpunga qammatip appaata qeqqani utaqqinissarput nammakkaluartoq, 19-nik ukiulik Inutsiaq Absalonsen Qaqortumeersoq utaqqikatassimasoq oqarpoq.
Qinnuteqaatit kommuninut qinnuteqarfiusunut ingerlatinneqarsimasut, ilinniarfinnut ingerlateqqinneqarsimapput.
- Tamatuma kingorna qinnuteqaatit Namminersornerullutik Oqartussani Ilinniagaqarnersiuteqarfimmut nassiunneqassapput. Qinnuteqartup aqqa inuttullu normua pineqareerpat naliliiffigineqassaaq ilinniagaqarnersiutinik tapiiffigineqassanersoq, Ilannguaq Nielsen Ilinniagaqarnersiuteqarfiup pisortaa erseqqissaavoq.
Ilinnialerumallutik qinnuteqarsimasut akineqarnissaannut piffissaliussaq siornagut sivikillineqaraluarmat ilinniarfiit ulapippallaarnertik pissutigalugu angummassinnaasimanngimmata sivitsuisoqaqqippoq.
Ilinniagaqarumallutik qinnuteqartut ilinniagaqarnersiuteqalernissamut akuerisaasimanerlutik itigartitaasimanerlutilluunniit juunip qaammataani ilisimatinneqassapput.
