Ilinniarusullutik qinnuteqartut, nunatsinni sinerissami tamaneersut, 160-it qinnuteqarsimapput, atuarfimmili ilinniartorineqarsinnaasut 60-it inissititerniarlugit sulineq maanna aallarteruttorpoq.
- Ilinniarniarlutik qinnuteqartut taama amerlatigimmata soorunami nuannerpoq, aammali ajuusaarnarpoq ilinniarusullutik qinnuteqartut amerlasuut itigartinneqartussaammata, Maniitsup Efterskoliani pisortaq, Flemming Cederholm, oqarpoq.
Qinnuteqaaterpassuit atuarfimmit maanna misissorneqaleruttorput, ilinniarniarlutillu qinnuteqaateqartut ilinnialissanerlutik allakkatigut kingusinnerpaamik apriilip aallaqqaataanni paasitinneqassapput.
Itigartinneqarumaartussat utaqqisut allattorsimaffianut inissinneqarallarumaarput, akueritissimasut pisinnaajunnaassagaluarpata ilinnialernissamut periarfissaqarniassammata, pisortaq Flemming Cederholm oqarpoq.
Efterskolimi ilinnialersussat nalinginnaasumik sisamanik ilinniagaqassapput, tassa kalaallisut, qallunaatut, tuluttut matematikkilu, ilinniakkallu taakku meeqqat atuarfiinisut misilitsissutigineqassapput.
Ilinniakkat taakku saniatigut toqqaalluni ilinniarsinnaaneq aamma ingerlanneqassaaq, toqqarneqarsinnaasullu makkuupput: timersorneq, nipilersorneq taavalu ilinniagassaq "nunamut, immamut nerisaqarnermullu" tunngasoq.