Qinnuteqaateqarniartorpassuit piareersimaffiginiarpaat

Taamaattumik Sisimiuni Sanaartornermik Ilinniarfiup naatsorsuutigaa ilinnialerumallutik qinnuteqartussat 320-t missanniit marloriaatinngussasut, tamanna pakkersimaarniarlugu Nuummi inuusuttuaqqanut sanasunngorniarfimmik aappaagu aallartitsilersaartoqalersoq, Jokum Møller ilinniarfiup pisortaa oqarpoq.

Ukiuni sisamani kingullerni kisitsisit taama inissisimasimapput, inuusuttuararpassuillu ilinniarfissarsinngitsoortarsimallutik, naak nalunngikkaluaripput nunatsinni sanasunik amigaateqartorujussuusugut, tamanna ilinniartunut, sulisitsisunut ilinniarfimmullu kipiluttunarpoq tusartuaratsigumi avataaniit tikisitsisoqartuartoq, Danmarkimiit nunanillu allaniit Jokum Møller oqarpoq nangillunilu.

- Nuummi atuarfeeranngualiornikuuvugut inersimasut 30-leereernikut atuartittarlutigit. Taava qinnuteqarnikuuvugut aappaguminngaanniit inuussuttuaqqanut sanasunngorniarneq neqeroorutiginiarlugu taamaalillutik illoqarfitsik qimannagu ilinniagaqalerniassammata.

Naluneqanngitsutut Nuummiit sanasungorniarumasut ikittuinnaasarput naak praktikkerfissarpassuaqaraluartoq nunatsinni sanaartornerup affangajaa Nuummi ingerlanneqartarmat, tassalu praktikkerfissarpassuit Nuummi atunngitsoorneqartarput.

Misiliinissap siunertaraa Nuummiuaqqat amerlanerusut sanasunngorniarumalernissaannik aqqutissiuussinissaq.