VIDEO Qinngutsinni aqqusinertaaq Dronningip atoqqaartissavaa

Kunngikkormiut tikeraaraangata pisorpassuaqartarpoq ulapittoqarlunilu. Assersuutigalugu Nuummi aqquserngit asfaltimik qallersorneqarnerat sukkanerusumik ingerlanneqarpoq.
Assi © : Jaaku Lyberth/KNR
Allattoq Jaaku Lyberth
juulip 22-at 2015 09:58

Dronning Margrethep prins Henriullu Nuummut tikeraarnerannut atatillugu Ataqqinartorsuaq Dronning Margrethe Qinngutsinni aqqusinermik atoqqaartitsillunilu atsiissaaq.

Kunngikkormiut tikinnissaat sioqqullugu Nuummi kommunip asfaltiliorfiani sulisut ulapipput.

- Qaangiuttuulaarnikuuvugut ullormik ataatsimik, asfaltfabrikki ulloq ataaseq 430 tonsimik asfaltiliorami,
Kommuneqarfik Sermersuumi aqqusinermi sulisut aqutsisuat Søren Christensen taama oqarpoq.

Aqqusineq Qinngutsinniittoq ukiamut aatsaat asfaltimik qallersorneqartussaagaluarpoq, dronningilli Nuummiinnerani aqqusineq dronningimit atoqqaartinneqarlunilu atserneqartussaammat qallersorneqarnera siuartinneqarpoq.

Aqqusineq 1,3 kilometerisut takitigivoq ullullu tallimat ingerlannerani asfaltimik qallersorneqarluni.

- Aqqusineq aasaq qaangiuppat asfaltimik qallersorneqartussaagaluarpoq, dronninngilli tikitussaanera pissutigalugu asfaltiterneqarnera siuartinneqarpoq, Søren Christensen oqarpoq.

 

Atoqqaartitsineq kalaallillu atisanik ilersugaannik nutaaliaanerusunik takutitsineq

Aqqusinniortut suliassaasa kingullersaraat, qilerniusap dronningimit qiorneqartussap ikkunissaa. Aqqusineq ualeru nal. 14.45 dronning Margrethemit atoqqaarfisiorneqassaaq atserneqarlunilu.

- Aqquserngup atoqqaartinneqarnerani matoqqassaaq dronninngillu atoqqaarfissioreerpagu atserneqareerpallu tamanut ammassalluni, Kommuneqarfik Sermersuumi aqqusinermi sulisut aqutsisuat Søren Christensen taama oqarpoq.

Aqqusineq qanoq taaguuteqassanersoq ataqqinartorsuup Dronning Margrehep aamma 90-inik ukiullip Naja Sandborgip ualeru nal. 14.45 atoqqaarfisioreerpassuk tamanut saqqummiunneqassaaq.

Aqqusineq atoqqaarfisiorneqareerpat, dronning Margrethe aamma prins Henrik linniarfissuup eqaarsaartarfitoqaanut pulaassapput, tassani kalaallit annoraaminernik ilusilersugaat nutaaliaanerusut takutinneqassallutik.