Qinngualanernut radioaktiiviusunut eqqaaveqarneq qassiiliuutigaat

Pineqartoq tassaavoq qinngualanernut radioaktiviusunut eqqaaveqarneq politikkikkut avatangiisinullu tunngasutigut qassiiliutaaleruttortoq. Eqqakkat ilaat Kalaallit Nunatsinneersuupput.

Qinngualanerit radioaktiviusut eqqaavissarsuannik 5.000 kubikmeterisut angitigisumik pilersitsinissamik akisussaaffik tigujumanagu Danmarkimi ministereqarfiit sisamat 2009-mili sorsuutilerput, atuagassiaq Ingeniøren allaaserinnippoq.

Qinngualanerit radioaktiviusut sakkukinnerit akunnattumillu sakkortussusillit, soorlu nunatsinneersunik uranissamik ilaqartut, ilisimatusarfimmit Risømeersuupput.

Ilisimatusarfik Risø ilaatigut atomit nukinganik nukissiorfimmik ingerlatsinermik allanillu misileraaviuvoq. Taamaammat Risøp nukissiorfiliornermut immikkoortortaa ingitserneqarmat qinngualanerit radioaktiviusut nunatsinneersut aamma sullisit atortullu kiisalu betoni savimernillu atorneqarsimasut sumut iginneqassanersut nalornissutaalersimavoq.

Sumiinnissaanik oqalliseqarneq Danmarkimi sakkortoqaaq. Danmarkimi Kalaallillu Nunaanni ujarassiuutit misissuisarfiup (GEUS)-ip misissuititai Danmarkimi eqqaavissaqqissunik 22-nik toqqartuisimapput, inassuteqaatillu maajip aallaqqaataani tunniuttussaagaat Berlingskemi allaaserineqarpoq.

Atomip sinnikui Risøp eqqaaniittumi aamma toqqoqqaneqarput. Pinngortitamik illersuiniaqatigiiffik Greenpeace isumaqarpoq, eqqakkat sapinngisamik Risøp qanitaaniitinniartariaqartut.

- Qinngualanerunut radioaktivitalinnut eqqaavissaqqissunik 22-nik Danmarkimi peqarsimappat taava Risøp eqqaaniittoqarsimassaaq. Allamiittariaqanngilaq, Terjei Haaland, silap pissusaa nukissiuuteqarnerlu pillugit Greenpeacemi sammisalik oqarpoq.

Eqqagassat Danmarkimi allamut angallannissaat innuttaasunut navianarsinnaanerat aamma qularinngilaa.