Qinngornermik navianartumik ilisimalikkat Qanaarmiuniit aallaaveqartariaqarput!

- Narsaarsummi qinngornerit navianartut pillugit RISØ-p nalunaarusiaa naammanngilaq, taama oqarpoq Peqqissutsimut Naalakkersuisuugallartoq Asii Chemnitz Narup.

1968-imi timmisartorsuaq Narsaarsummut nakkarpoq, tamatumalu sunniutigisinnaasai qinngornerit navianartut pillugit ilisimatusarnermik sullissivik RISØ nalunaarusiamik suliaqarpoq. Nalunaarusiaq taanna sapaatip-akunnerata uuma ingerlanerani Qaanaami innuttaasunut saqqummiunneqarmat, Peqqissutsimut naalakkersuisuugallartup Asii Chemnitz Naruppip naammaginngilaa.

(20 sek.)

- Assersuutigalugu arlallit oqaatigivaat amerlunnermik nappaatillit amerlasuujusut, tamannalu naluarput suminngaanniit aallaaveqarnersoq, tamakkulu paasisariaqarpavut. Oqaatigineqartut ilagaat 1968-imi timmisartorsuaq nakkarmat piniariartarfimmi Narsaarsummiittut aamma meerartaqarsimasut, meeqqat taakku ullumikkut inersimasunngorsimapput, soorunami aamma taakkua peqqissutsikkut qanoq innerat ilisimaqqissaartariaqarpavut, Asii Chemnitz Narup oqarpoq.

Taanna isumaqarpoq, aammaarluni tusarniaasoqaqqittariaqartoq.

- 1995-imi tusarniaaneq Københavnimi ingerlanneqarsimavoq, tullia Qaanaami ingerlanneqartariaqarpoq, sumiiffimmi tassani susoqarfiusimasumi ingerlanneqariaqarpoq, taavalu immikkut ilisimasalittut inissinneqartariaqartut tassaapput; Qaanaarmiut!, Asii Chemnitz Narup oqarpoq.

Taamatuttaaq Asii Chemnitz Narup uparuaavoq, aalajangiisoqassatillugu ilisimatuussutsikkut ilisimalikkat aallaavigineqarpallaartartut.

Avanersuarmilu nunaqavissut ilisimasaat aaqqissuussamik tamakkiinerusumillu katersorneqartariaqartut.

- Soorlu aaviinikkut aammalu ukua amerluttorpassuartut oqaatigineqartut immikkut misissuiffigineqartariaqarput, ilisimasariaqarparpummi amerlunneq taanna sumik patsiseqarnersoq. Aamma meeqqat taamani Narsaarsummiissimasut inersimasunngoreernermi qanoq innersut paasisariaqarpavut, Asii Chemnitz Narup oqarpoq.

Taanna nangilluni oqarpoq, danskit kalaallillu naalakkersuisuisa akornanni tamanna oqaloqatigiissutigineqassasoq.