Qinngasaaruttarneq iliuuseqarfigaat

Meeqqat atuarnerminnik nuannarinnittut ikiliartuinnarput, qinngasaaruttarnerlu peqqutaaqataanerpaavoq. Taama atuartut peqqissusaat pillugu 1994-imiit 2002 tikillugu misissuisimaneq inerniliivoq. Misissuinerup kingorna Atuarfitsialak atuutilermat, qinngasaaruttarnermut nutaaliorluni iliuuseqarnerit arlaqartut maannamut ingerlanneqartarput. Qaqortumi Tasersuup atuarfiani qinngasaaruttarnermut nutaaliorluni aamma iliuuseqartoqarsimavoq. Tasersuup Atuarfiani ittu Gerhardt Egede oqaluttuarpoq atuartut trinnikkaarlutik ukiarmi sammeqarsimasut, ingammik nukarliit akulliillu. Taakku sap.ak. sammisamik taallugu qinngasaaruttarneq pillugu suliaqarsimallutik.

- Atuartut anginerulaartut qinngasaaruttarnermik ajornartorsiuteqartut asimukaallugit aamma immikkut sammisaqartinneqarput. Asimut aallarlutik imminnut akaareqatigiinnerunissaq anguniarlugu iliuuseqarsimapput.

Atuartut immikkut iliuuseqartinneqarnerisa saniatigut Qaqortumi ornigullutik oqaloqatiginnittartut pitsaaliuisorlu aamma suleqatigineqartut Gerardt Egede oqarpoq.

- Taakku klassemi ilinniartitsisut peqatigalugit ataatsimiittarput susassaqaraangimillu ikioqatigiillutik tamanna sammisarlugu. Suleqatigiinneq pitsanngoriartorpoq, suleqatigiilu imminnut qanoq atornissartik aamma ilikkariartorlugu.

Qaqortumi Tasersuup Atuarfiani ilinniartitsisut namminneerlutik ornigullutik oqaloqatiginnittartunut pitsaaliuisunullu saaffiginnittarput.

Atuartut peqqissusaat pillugu 1994-imiit 2002 ilanngullugu misissuinermi atuartut aqqanilinnik ukiullit 20 %-ingajaat qinngasaartittarput, misissuinerlu naapertorlugu nukappiaqqat pimmatiginninnerpaasarput, niviarsiaqqallu pimmataanerpaasarlutik. Misissuineq KIIIP-imit saqqummersinneqarpoq.