Qinikkat marluk qinigaasinnaatitaanngitsut
Kommunimut qinersinermi qinigaasut ilaasa marluk qinigaasinnaatitaanngitsut qinigaasinnaatitaanermut ataatsimiititaliamit nalunaarutigineqarpoq.
Qinigaasinnaanngitsutut nalunaarutigineqartut marluk Siumuminngaanneersuupput, Upernaviullu kommunalbestyrelsianut qinigaasimagaluarlutik. Tassaapput Edvard Heilmann aamma Kim Dam.
Edvard Heilmann imigassartorsimalluni biilersimanini pissutigalugu qinigaasinnaatitaanngitsutut nalilerneqarpoq. Qinigaasinnaatitaanngitsutut nalilerneqartut aappaat tassaavoq Kim Dam. Taanna 2001-imi 12.000 koruunit nalinginik peqquserluuteqarsimasutut nunatta eqqartuussivianit eqqartuunneqarsimavoq.
Upernaviup Kommunalbestyrelsianut qinigaasut sinnerisa kiisalu sinniisussat qinigaasinnaatitaanermut ataatsimiititaliamit akuerineqarput. Narsap Kommuneani qinigaasut tamarmik akuerineqarputtaaq.
Qinigaasinnaatitaanermut ataatsimiititaliaq ualeru ataatsimeeqqissaaq. Kommunit sinnerisa ataatsimiinnermi tassani eqqartorneqarnissaat ilimagineqarpoq.
